एजेन्सी । इन्ग्लिश क्लब आर्सनलले युनी इम्रीलाई प्रशिक्षकमा नियुक्त गरेको छ । आर्सनलले पेरिस सेन्ट जर्मेन (पिएसजी) का पूर्व प्रशिक्षक इम्रीलाई बुधबार प्रशिक्षक नियुक्त गरेको अन्तर्राष्ट्रिय समाचार संस्थाहरुले जनाएका छन् ।
प्रशिक्षक आर्सेन वेंगरले सिजनको अन्त्यसँगै क्लब छाडेपछि आर्सनलले इम्रीलाई प्रशिक्षक बनाएको हो । स्पेनका ४६ वर्षिय प्रशिक्षक इम्रीले लन्डन क्लब आर्सनलसँग ३ वर्षे सम्झौता गरेका छन् । योसँगै इम्री आर्सनलमा २२ वर्ष ८ महिनापछि नयाँ प्रशिक्षक बन्ने पहिलो प्रशिक्षक बनेका छन् । यसअघि आर्सनलको प्रशिक्षकमा वेंगरले २२ वर्ष बिताएका थिए ।
प्रशिक्षक इम्रीले पिएसजीलाई यो सिजन तीन उपाधि दिलाएर क्लब छाडेका थिए । पिएसजीले इम्रीको स्थानमा बोरुसिया डर्टमण्डका पुर्व प्रशिक्षक थोमस टुचेललाई प्रशिक्षक नियुक्त गरिसकेको छ । इम्रीले सन् २०१४ देखि २०१६ सम्म स्पेनिस क्लब सेभियालाई लगातार तीन पटक युरोपा लिग जिताएका थिए ।