एजेन्सी । सोमबार रुस भ्रमणमा पुगेका भारतीय प्रधानमन्त्री मोदीले बलियो कूटनीतिक सम्बन्धको संकेत गर्दै राष्ट्रपति पुटिनसँग भेटवार्ता गरेका छन् । सोटिस्थित ब्ल्याक सी रिसोर्टबाट मोदीले भने, ‘रुस भारतको ऐतिहासिक मित्र हो र यी चार वर्षमा पुटिनसँगको मेरो व्यक्तिगत सम्बन्ध पनि नयाँ स्तरमा पुगेको छ जसकारण म अत्यन्तै हर्षित छु ।’

तरपनि गत अप्रिलमा चीन भ्रमणपछि मोदीको रुस यात्रालाई अहिले धेरैले अनौठो मानिरहेको सीएनएनले जनाएको छ । किनकी एकातर्फ मोदीले चीनको सामना गर्न अमेरिका, जापान र अष्ट्रेलियासँग सहकारिता बढाइरहेका छन् भने अर्कोतर्फ उनले चीन, रुस र पाकिस्तान आबद्ध रहेको सांघाइ कोर्पोरेसनसँग पनि अघि बढ्न खोजिरहेका छन् । मोदीको यही रणनीतिका कारण धेरै मानिसहरुले उनी रुस, अमेरिका र चीनलाई लिएर द्विविधामा रहेको टिप्पणी गर्ने गरेका छन् । तरपनि मोदीका लागि रुस भ्रमण अहिलेको परिवेशमा भने धेरै महत्वपूर्ण रहेको विश्वविद्हरुको भनाइ छ ।

वास्तवमा अहिले छिमेकी चीन अमेरिकाको व्यापारिक कारबाहीमा परिरहँदा भारतलाई पनि आफ्नो अर्थतन्त्रमाथि संकट आइलाग्ने डर रहेको छ । त्यसकारण भारतले रुसलाई आफ्नो कुशल व्यापारिक मित्र बनाउन जरुरी ठानेको बताइन्छ । त्यसैगरी ट्रम्प प्रशासनले आणविक सम्झौताबाट पछि हट्दै ईरानमाथि थप प्रतिबन्ध लगाउने घोषणा गरिरहेका छन् । यसले पनि भारतीय लगानीलाई संकटमा पार्दै तेलको आयातमा गम्भीर असर गर्न सक्ने सम्भावना रहेको छ । यसकारण पनि रुससँग राम्रो कूटनीतिक सम्बन्ध कायम गर्नु भारतका निम्ति अत्यन्तै जरुरी मानिएको हो ।

त्यस्तै पछिल्लो पाँच वर्षमा भारतले अमेरिकाको तुलनामा रुसबाट ६२ प्रतिशत हतियारहरु प्राप्त गरेको छ । पाकिस्तान र चीनसँगको लगातार विवादका कारण पनि भारतले विगत केही समयदेखि धेरै हतियार जम्मा गर्न आवश्यक ठानिरहेको बताइन्छ । तर ईरानमाथिको प्रतिबन्धपछि रुस र भारतबीचको यो सम्झौतामा समेत नयाँ अवरोध आउने भएपछि भारत झन् चिन्तित बनेको हो । उता बाहिरीतर्फ रुस र भारतबीचको सम्बन्ध प्रगाढ देखिएपनि आन्तरिक रुपमा धेरै समस्याहरु आइरहेको बताइन्छ । पछिल्लो समय रुस पाकिस्तान र चीन दुवैसँग नजिक हुँदै गएकाले पनि यसको प्रभाव बिस्तारै भारतसँगको सम्बन्धमा परिरहेको बताइएको हो । तरपनि सकारात्मक सन्देश दिँदै मंगलबार मोदीले पुटिनसँगको भेट अत्यन्तै उपलब्धिमूलक भएको उल्लेख गरेका छन् ।