खेल

पञ्जाव विरुद्ध मुम्बईको रोमाञ्चक जित, दुबै टिमको प्लेअफमा पुग्ने सम्भावना जिवितै

पञ्जाव विरुद्ध मुम्बईको रोमाञ्चक जित, दुबै टिमको प्लेअफमा पुग्ने सम्भावना जिवितै

एजेन्सी । इन्डियन प्रिमियर लिग (आईपीएल) क्रिकेटमा मुम्बई इन्डियन्सले जित निकालेको छ । किंग्स इलाभेन पञ्जाबमाथि ३ रनको रोमाञ्चक जित हात पार्दै मुम्बईले अन्तिम चारमा पुग्ने सम्भावनालाई कायमै राखेको छ ।
मुम्बईस्थित वान्खडे रंगशालामा भएको खेलमा घरेलु टोली मुम्बईले पञ्जाबलाई निरिह बनाएको हो । १८७ रनको चुनौति पछ्याउदै ब्याटिङ गरेको पञ्जाबले निर्धारित २० ओभरमा ५ विकेटको क्षतिमा १८३ रन मात्रै बनाउन सक्यो । पञ्जाब कुनै बेला जित नजिक रहेपनि हारको सिकार बन्यो । 

पञ्जाबका लागि लोकेश राहुलले ९४ रन बनाएपनि आफ्नो टिमलाई जिताउन सकेनन् । उनले ६० बलमा १० चौका र ३ छक्काको मद्दतमा ९४ रन बनाएका थिए । त्यस्तै, पञ्जाबका लागि एरोन फिन्चले ४६ रन बनाएपनि अन्य खेलाडीले राम्रो रन बनाउन सकेनन् ।
मुम्बईका लागि जस्प्रित बुम्रहले ३ विकेट लिए ।

यसअघि टस हारेर पहिले ब्याटिङ गरेको मुम्बईले निर्धारित २० ओभरमा ८ विकेटको क्षतिमा १८६ रन बनाएको थियो । मुम्बईका लागि कैरोन पोलार्डले २३ बलमा ५० रन, क्रुनाल पान्ड्याले ३२ रन बनाएका थिए ।
यता बलिङतर्फ पञ्जाबका एन्ड्रव टाईले ४ विकेट लिएका थिए ।

आईपीएलको शीर्ष स्थानमा सनराइजर्स हैदराबाद रहेको छ । १२ खेल खेलेको हैदराबादले ९ खेलमा जित ३ खेलमा हार ब्यहोर्दै १८ अंक बनाएर प्लेअफमा पुगि सकेको छ । त्यस्तै १६ अंक बनाएको चेन्नाई सुपर किंग्स पनि प्लेअफमा पुगि सकेको छ । यता तेस्रो स्थानमा रहेको कोलकत्ता नाइट राइडर्सको १३ खेलबाट १४ अंक रहेको छ । चौथो स्थानमा उक्लिएको मुम्बई इन्डियन्स, राजस्थान रोयल्स र किंग्स इलाभेन पञ्जाबको समान १२ अंक रहेको छ ।

तपाईंको मत