काठमाडौं । नेकपा एमाले र नेकपा माओवादी केन्द्रबीच बिहीबार एकता गर्ने निर्णय गर्दै एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालबीच भएको सहमतिलाई अनुमोदन गरेको छ ।
एमाले स्थायी कमिटीको बैठकले यस्तो निर्णय गरेको सचिव योगेश भट्टराईले जानकारी दिए ।
उनका अनुसार बिहीबार हुने एकतापछि नयाँ बन्ने पार्टीको केन्द्रीय कमिटीको संख्या ४४१ हुने, ४३ सदस्यीय स्थायी कमिटी र चुनाव चिन्ह सूर्य हुनेछ ।
२४१ एमाले र २ सय माओवादीका केन्द्रीय कमिटीमा रहनेछन् ।
स्थायी कमिटीको बैठकले दुई अध्यक्षबीच भएको निर्णयलाई स्वागत गरेको भट्टराईले जानकारी दिए ।
“पार्टी एकता कुन साल, कुन महिनामा होला भन्ने थियो” उनले भने, “ कुन दिन भन्दै अब घण्टातिर आएका छौं । निर्वाचन आयोगमा प्रस्तुत गर्ने विधान, लगायतका विषय एकता संयोजन समितिले टुंगो लगाउनेछ ।”
यसअघि एमालेका नेता वामदेव गौतमले भोलि बिहीबार नै पार्टी एकता हुने बताए ।
स्थायी कमिटीको बैठकपछि पत्रकारहरुसँग कुरा गर्दै उनले बिहीबार नै पार्टी एकता हुने बताएका हुन् ।
“भोलि नै पार्टी एकता हुन्छ,” गौतमले भने, “एकता संयोजन समितिको बैठकले सबै कामको टुंगो लगाउँछ । बेलुकासम्म पार्टी एकताको घोषणा हुन्छ ।” चुनाव चिन्ह सूर्य नै हुने उनले जानकारी दिए । यसैबीच बिहीबार बिहान नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालले मदन भण्डारीको शालिकमा माल्यापर्ण गरेर एकताको घोषणा गर्ने तयारी छ ।