काठमाडौं । नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल प्रचण्डबीच बुधबार दुईघण्टा वार्ता भएको छ । एकता प्रक्रियामा देखिएको आशंका हटाउने विषयमा दुई नेताबीच छलफल भएको थियो ।
बुधबार बिहान भएको एक्लाएक्लै वार्तापछि दुवै पार्टीले आन्तरिक छलफल गर्दैछन् । त्यसका लागि एमाले र माओवादी केन्द्र दुवैले छुट्टाछुट्टै बैठक बोलाएका छन् ।
माओवादी केन्द्रले सचिवालय र एमालेले स्थायी कमिटीको बैठक बोलाएका छन् । दुई नेताको बैठकपछि एमालेका नेता विष्णु पौडेलले दुई नेताले आफूहरुलाई दिएको जानकारी अनुसार बैठक सकारात्मक रुपमा अघि बढेको छ ।
“हामीलाई वर्किङ प्रोग्रेस भनेर जानकारी दिनुभएको छ,”पौडेलले पत्रकारसँग भने, “एकता संयोजन समितिको बैठक भोलिका लागि बोलाउनुभएको छ । कसरी एकता निष्कर्षमा पुर्याउने भन्ने बारेमा छलफल हुनेछ ।”
त्यस्तै नेकपा माओवादी केन्द्रका नेता जनार्दन शर्माले एकता संयोजन समितिको बैठक बिहीबार बिहान १० बजे बोलाइएको जानकारी गराए । उनले एकता संयोजन समितिको बैठकमा नै सबै कुरा जानकारी गराउने नेताहरुले बताएको जानकारी दिए ।
फाइल तस्बिर
