काठमाडौं । नायिका करिष्मा मानन्धरले आफ्नी छोरी कविता  आफूले थाहै नपाई चलचित्रमा डेब्यु गरेको बताएकी छन् । चलचित्र ‘एउटा यस्तो प्रेम कहानी’ को मंगलबार टिजर सार्वजनिक कार्यक्रममा उनले छोरीलाई आफ्नो ब्यानरबाट चलचित्रमा डेब्यू गराउने तयारी गरे पनि उनी त्यस अगाडि अर्कै चलचित्रमा अनुबन्द्ध भएको बताइन् । 

यो अबसर जुराइदिएका हुन् नायक शिव श्रेष्ठले । शिव श्रेठको प्रस्तुती चलचित्र ‘एउटा यस्तो प्रेम कहानी’ मार्फत करिष्माकी छोरी कविता मानन्धरले डेब्यु गर्न लागेकी हुन् । करिश्माले आफ्नो एसईई सकिएपछि छोरीलाई अभिनयमा प्रवेश गराउने बताउँदै आएकी थिइन् । 

“यो खुसी व्यक्त गर्ने मसँग कुनै शब्द छैन । म आफ्नै ब्यानरबाट कवितालाई लञ्च गर्ने तयारीमा थिएँ तर शिव दाईले उछिन्नु भयो,” करिष्माले भनिन् । 

गत वर्ष नेपाल आएकी कविता त्यस अघि अध्ययनका लागि अमेरिकामा बस्दै आएकी थिइन् । गएको वर्षदेखि भने उनी नेपालमा नै छिन् । 

कविता मानन्धरसँगै नायक शिव श्रेष्ठका छोरा शक्ति श्रेष्ठले यही चलचित्रबाट डेब्यु गर्दैछन् । टिजरमा भने यी दुवैलाई देखाइएको छैन । दिपेश सापकोटाले निर्देशन गरेको ‘एउटा यस्तो प्रेम कहानी’ मा शक्ति र कविताको जोडी बाँधिएको छ ।

चलचित्रमा आयुष्मान देशराज जोशी, संजोग राणा, प्रियंका कार्की, वर्षा राउत, शिव श्रेष्ठ, नरेन खड्का, बिष्णु चेम्जोङ, रेखा फागो, बसुन्धरा भुषाल, किरण केसी, मिथिला शर्मालगायतका कलाकारको अभिनय छ ।