काठमाडौं । भारतीय प्रधानमन्त्री नरेन्द्र मोदीको नागरिक अभिनन्दन कार्यक्रममा नेपाली पत्रकारलाई रोक लगाइएको छ ।
काठमाडौं महानगरपालिकाले मोदीलाई दिउसो राष्ट्रियसभा गृहमा नागरिक अभिनन्दन गर्ने कार्यक्रम रहेको छ । उक्त कार्यक्रमको तस्बिर खिच्न तथा समाचार संकलनका लागि राष्ट्रियसभा गृह पुगेका पत्रकारलाई गेटमै रोकेपछि पत्रकारहरुले बिरोध गर्दै क्यामेरा तथा पेन डाउन गरेका छन् ।
भारतीय सञ्चार माध्यमलाई भने कार्यक्रमस्थल प्रवेशमा रोक लगाइएको छैन ।
यसैबीच नेपाल भ्रमणमा रहेका भारतीय प्रधानमन्त्री नरेन्द्र मोदीले नेपाल पनि आईपीएलमा जोडिएको भन्दै नेपाल र भारतका जनता जनताबीचको सम्बन्ध बलियो हुँदै गएको बताएका छन् ।
काठमाडौं महानगरपालिकाले आयोजना गरेको नागरिक अभिनन्दन कार्यक्रममा सम्बोधन गर्दै उनले यस्तो बताएका हुन् । “मेरोमात्रै होइन पुरै भारतको सम्मान हो । सवा सय करोड भारत कृतज्ञ छन्,” मोदीले सम्बोधनको क्रममा भने ।
उनले आफू नेपाल आउँदा शान्तिको अनुभूति हुने पनि बताए ।
“म राजनीतिमा नहुँदा पनि नेपाल आउँदा शान्तिको अनुभूति हुन्छ,” मोदीले भने, “म कार्यक्रम बनाएर लुम्बिनी अवश्य जानेछु ।”
“सन्दीप लामिछाने आइपीएलमा भाग लिएका छन्,” उनले भने, “आइपीएलमा नेपाल पनि जोडिएको छ । क्रिकेट मात्रै होइन अन्य खेलबाट पनि जनता जनताबीचको सम्बन्ध मजबुद हुनेछ ।”