काठमाडौं । नेपालको दुईदिने धार्मिक भ्रमणमा आएका भारतीय प्रधानमन्त्री नरेन्द्र मोदी काठमाडौं आइपुगेका छन् । भारतबाट एयर इन्डियाको विशेष विमानमार्फत जनकपुर आइपुगेका मोदी केहीबेरअघि मात्रै काठमाडौं आइपुगेका हुन् ।
जनकपुर विमानस्थलमा भारतीय प्रधानमन्त्री मोदीलाई रक्षामन्त्री ईश्वर पोखरेलले स्वागत गरेका थिए ।

जानकी मन्दिरमा प्रधानमन्त्री केपी शर्मा ओलीले स्वागत गरेका थिए । काठमाडाैंमा परराष्ट्रमन्त्री प्रदीप ज्ञवालीले स्वागत गरेका थिए । भारतीय प्रधानमन्त्रीलाई आजै सरकारले गार्ड अफ अनरद्वारा सम्मान व्यक्त गर्दैछ । त्यसपछि मोदीले उपराष्ट्रपति नन्दबहादुर पुन र राष्ट्रपति विद्यादेवी भण्डारीसँग भेटवार्ता गर्दैछन् ।
बेलुका उनले बत्तिसपुतलीमा रहेको होटल द्वारिकामा प्रधानमन्त्री लगायत विभिन्न राजनीतिक दलका नेताहरुसँग भेटवार्ता गर्दैछन् । अरुण तेस्रोको शिलन्यास पनि गर्ने तयारी छ ।

प्रधानमन्त्री ओली र भारतीय समकक्षी मोदीले स्वीच थिचेर यसको शिलन्यास गर्ने तयारी छ । यसअघि जनकपुरमा सम्बोधन गर्दै भारतीय प्रधानमन्त्री नरेन्द्र मोदीले नेपाल र भारतबीचको सम्बन्ध त्रेतायुगदेखिको भएको बताएका थिए ।
नेपालले संविधान जारी गरेपछि त्यसमा रहेका प्रावधानहरुप्रति असन्तुष्टि व्यक्त गर्दै भारतले नेपालमाथी नाकाबन्दी लगाएको थियो ।

नाकाबन्दीपछि पहिलोपल्ट नेपाल आएका मोदीले त्यसबारेमा आफ्नो धारणा राख्ने अपेक्षा गरिएको थियो तर उनले आफ्नो सम्बोधनका क्रममा नेपाल र भारतबीचको सम्बन्ध कसैले पनि भत्काउन नसक्ने खालको बताए पनि नाकाबन्दीका बारेमा भने केही पनि बोलेनन् ।
“अगष्ट २०१४ मा पहिलोपटक प्रधानमन्त्रीको रुपमा नेपाल आएको थिएँ,” मोदीले आफ्नो सम्बोधन सुरु गर्दै भनेका थिए, “संविधानसभामा पनि मैले भनेको थिएँ म जनकपुर आउँछु । तर आउन ढिला भएकोमा क्षमा माग्छु । भद्रकाली एकादशीका दिन मलाई सीतामाताले दर्शन दिनुभएको छ ।”

उनले आफू राजा जनकको राजधानी सीताको पवित्र भूमिमा आउने पहिलेदेखिकै इच्छा रहेको बताए । जानकी मन्दिरमा दर्शन गरेर मनोकामना पूरा गरेर जिवनमा धन्य भएको समेत उनले बताए ।
हिन्दीमा सम्बोधन गरेका मोदीले नेपाली भाषामा भने, “मेरो यसपटकको नेपाल भ्रमण प्रधानमन्त्रीको रुपमा र एउटा तिर्थ यात्रीको रुपमा रहनेछ  ।” उनले नेपाल र भारतबीचको मित्रता आजको होइन त्रेता युगको भएको बताएका थिए ।
“राजा जनकले अयोध्या र जनकपुर होइन भारत र नेपालालई बन्धनमा बाँधेका छन्,” मोदीले सम्बोधनका क्रममा भने, “यो राम सीताको बन्धन हो । रामेश्वर देखि पशुपति र लुम्बिनीदेखि बोधगयाको बन्धन हो ।” उनले यही बन्धनले आफूलाई जनकपुर ल्याएको बताएका थिए ।
उनले नेपाल र भारतको दुःख र सुख, आकांक्षा, सपना र संकल्प, मन र मन्दिर सबै एकै भएको बताएका थिए ।  “नेपालविना भारतको आस्था पनि अधुरो छ, नेपालविना भारतको इतिहास अधुरो हुन्छ,” उनले भने । 

तस्बिर सरिता खड्का