काठमाडौं । अनलाइनमार्फत चोरीका सामान सस्तोमा बेचेको पाइएपछि प्रहरीले सरस्वती क्लबका पूर्व कप्तान दिपेश श्रेष्ठसहित २ जनालाई  पक्राउ गरेको छ ।
श्रेष्ठसहित बाच्छो भन्ने सुवास खड्कालाई पक्राउ गरेको प्रहरीले जानकारी दिएको छ । दिपेशले नेपाल पुलिस क्लबबाट पनि व्यावसायिक फुटबल खेलिसकेका छन् । बजारबाट आएका चोरीका मोबाइल दिपेशले ५० प्रतिशत कम मुल्यमा हाम्रो बजार डटकम लगायतका अनलाइन माध्यमबाट बेच्दै आएको काठमाडौं प्रहरीका एसएसपी विश्वराज पोखरेलले बताए । 
प्रहरीले दिपेशको साथबाट विभिन्न कम्पनीका ३३ सेट मोवाइल, पावर बैंक ३, सोनी र साइन कम्पनीको एलइडी, डिजिटल क्यामेरा, ल्यापटप ५ थान र नगद ५३ हजार ५ सय पनि बरामद गरेको छ ।
पोखरेलले पक्राउ परेकामाथी थप अनुसन्धान भइरहेको र यो गिरोहका केही फरार रहेको बताए ।