काठमाडौं । नेपाली कांग्रेसको भ्रातृ संगठन नेपाल विद्यार्थी संघको जिल्ला अधिवेशन माग गर्दै कञ्चनपुरका दुई विद्यार्थी नेता आमरण अनशनमा बसेका छन् ।
नेविसंघ कञ्चनपुरको जिल्ला अधिवेशन तत्काल गर्नु पर्ने माग गर्दै विद्यार्थी नेताद्वय केशवराज जोशी र रमेश कुँवर बिहीबारबाट आमरण अनशनमा बसेका हुन् ।
नेविसंघको स्थापना दिवसको अवसर पारेर जिल्ला अधिवेशन माग गर्दै सदरमुकाम महेन्द्रनगरस्थित कांग्रेसको पार्टी कार्यालयमा आमरण अनशन बसेको विद्यार्थी नेता जोशीले जानकारी दिए ।
सुदृढ र बलियो नेविसंघका लागि विधिवत जिल्ला अधिबेशनका गराउन आमरण अनशन बस्न बाध्य भएको अर्का विद्यार्थी नेता कुँवरले सामाजिक सञ्जाल फेसबुकमा लेखेका छन् ।
२०७३ साउनमा कञ्चनपुर लगायत १० जिल्लामा अधिवेशन नगरिकनै नेविसंघको ११ औं महाधिवेशन सम्पन्न भएको थियो । महाधिवेशनले नयाँ नेतृत्व चयन भएको तीन महिना भित्रै ती १० जिल्लामा अधिवेशन गरेर जिल्ला नेतृत्व चयन गर्ने म्याण्डेड दिएको थियो ।
तर ११ औं महाधिवेशनबाट केन्द्रीय अध्यक्षमा चयन भएको नैनसिँह महर नेतृत्वको कार्यसमितिले अहिलेसम्म कुनै पनि जिल्लामा अधिवेशन गराउन सकेको छैन् ।