एजेन्सी । बेलायतका राजकुमार ह्यारी र मेगानको विवाहमा शाही गोर्खाली सैनिकहरुलाई पनि भव्य रुपमा स्वागत गरिने बताइएको छ । आगामी मे १९ मा हुने शाही समारोहमा राजकुमार ह्यारीसँगै २००७ मा अफगानिस्तानको सेवा गरेका गोर्खा राइफलको फोल्कस्टोन प्रथम बटालियनका सेना पनि सहभागी हुने बताइएको हो ।
बकिङगम दरबारका प्रवक्ताले बताए अनुसार आमन्त्रित सबै सैनिकहरुको उपस्थिति राजकुमार ह्यारीका लागि अत्यन्तै महत्वपूर्ण रहेकाले पनि उनीहरु सबै ह्यारीका विशेष अतिथिका रुपमा सहभागी हुनेछन् । विवाहमा सेनाको आगमन हुने खबर गरिएपछि यसअघि राजकुमार ह्यारी र मेगानले पनि धेरै खुसी व्यक्त गरेका थिए ।
यो भन्दा अगाडि पनि राजकुमार ह्यारीले आफूलाई गोर्खा आर्मीमा जाने धेरै ठूलो इच्छा रहेको बताएका थिए तर समय परिस्थितिका कारण ढिला भएको भन्दै उनले दुःख व्यक्त गरेका हुन् । गत वर्ष पनि ह्यारीले पहिलो अफगानिस्तान भ्रमणका क्रममा उनलाई सुरक्षा दिएका मेजर छन्क्रे बहादुर पुनसँग दरबार परिसरमै भेट गरेका थिए । विवाह समारोहमा भने गोर्खाली सहित २५० सैनिकहरुले विशेष प्रस्तुती दिने बताइएको छ । यसका साथै वीन्स्टर क्यासलतर्फको सडकमा लामबद्ध भएर परेड खेल्ने कार्यक्रम समेत रहेको बताइएको छ ।