एजेन्सी । जापानका प्रधानमन्त्री सिन्जो आबे मंगलबार अमेरिकी राष्ट्रपति ट्रम्पसँग भेटवार्ता गर्न उनको फ्लोरिडा रिसोर्टमा पुगेको सीएनएनले बताएको छ । अहिले आफ्नै देशमा चर्को विरोध र कानूनी विवादको सामना गरिरहेका आबेका लागि यसपटकको अमेरिकी भ्रमण अत्यन्तै महत्वपूर्ण रहेको बताइएको छ । यस दुई दिने भ्रमणको प्रमुख उद्देश्य उत्तर कोरिया र व्यापारिक मुद्दामा अमेरिकासँग निश्चित छलफल गर्नु रहेको उनले बताएका छन् ।
भ्रष्टाचार काण्डका कारण प्रधानमन्त्री पद समेत संकटमा परिरहेका बेला उत्तर कोरिया आबेका लागि अर्को चुनौतिको विषय बनेको छ । दक्षिण कोरिया र अमेरिकाले किमसँग भेटवार्ता गर्न सहमति जनाउनु अघि जापान पनि यस मुद्दामा सधैँ अगाडि देखा पर्ने गरेको थियो ।
तर उत्तर कोरिया विरुद्ध कडा प्रतिक्रिया दिने क्रममा दक्षिण कोरिया र अमेरिकाको साथ गुमाएपछि जापान एक्लो बनेको हो । यसै त उत्तर कोरियाबाट प्रत्यक्ष धम्की र हमलाको समेत सामना गरिसकेको जापानले, १२ करोड जनताको सुरक्षाका कारणले पनि उत्तर कोरियालाई सधैँ गम्भीर रुपमा लिँदै आएको छ । तर अहिले उत्तर कोरिया सम्बन्धि छलफलमा अमेरिका, चीन र दक्षिण कोरियाबीच लगातार कुरा अघि बढिरहँदा प्रधानमन्त्री आबेलाई भने सम्पूर्ण कूटनीतिक वार्ताबाट किनारा लगाइएको छ । त्यसकारण पनि ट्रम्पसँगको छलफल जापानका लागि धेरै महत्वपूर्ण रहेको बताइएको हो ।
प्रधानमन्त्री पद सम्हालेदेखि नै आबेले ट्रम्पसँग अत्यन्तै निकटको सम्बन्ध राख्दै आएपनि अन्तिम समयमा ट्रम्पले जापानको साथ छोडेका हुन् । त्यसैगरी व्यापार क्षेत्रमा पनि अमेरिकी शुल्क वृद्धिको शिकार बनिरहेकाले जापान र अमेरिकाबीचको सम्बन्ध चिसिँदै गइरहेकोबारे अहिले दुवै जानकार छन् । यसैले यो भ्रमणलाई अमेरिकासँगको सबै समस्या सुल्झाउन र उत्तर कोरियाको मद्दामा पनि जापानलाई अघि बढाउन उपयोग गरिने आबेको भनाइ छ । वास्तवमा आगामी मे महिनामा तय भएको ट्रम्प–किम बैठक प्रमुखगरी अमेरिकालाई खतरामुक्त बनाउनमा केन्द्रित रहने बताइएकाले पनि वार्तामा जापानको सुरक्षाबारे कतै उल्लेख नगरिनेमा जापानलाई सबैभन्दा ठूलो चिन्ता रहेको छ ।
अर्कोतर्फ जापानको सत्तामा आबेको पकड खुकुलो बन्दै गइरहेकाले पनि ट्रम्पको सहयोग पाउन कठिन हुन सक्ने विज्ञहरुको भनाइ छ । यसअघि ट्रम्प प्रशासनले दक्षिण कोरियासँग दुईपक्षीय सम्झौता गरि शुल्क वृद्धिमा सहुलियत प्रदान गरेको थियो तर नजिकी सम्बन्ध राख्ने भएपनि जापानसँगको व्यापारिक नीतिमा भने अमेकिाले कुनै परिवर्तन नल्याउने अडान लिएको छ । त्यसैले उत्तर कोरियासँगको वार्तामा जापानको प्राथमिकतालाई पनि अघि सार्न अमेरिकालाई आग्रह गर्न आबेले ट्रम्प प्रशासनसँग राष्ट्रिय हित विपरित व्यापारिक सम्झौता गर्नुपर्ने जोखिम पनि उत्तिकै रहेको बताइएको छ ।