काठमाडौंबाट प्रकाशित हुने दैनिक पत्रपत्रिका सबैजसोले नेकपा एमाले र माओवादी केन्द्रबीच हुनलागेको पार्टी एकता, प्रधानमन्त्री एवम् नेकपा एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालबीच भएको वार्ता, एमाले स्थायी कमिटी बैठक र आज बस्ने एकता संयोजन समितिको बैठकलाई प्राथमिकतामा राखेर समाचार प्रकाशित गरेका छन् ।
नागरिक दैनिकले एमाले–माओवादी एकता, निर्णायक वार्ता आज भन्ने शीर्षकमा पहिलो पृष्ठमा समाचार प्रकाशित गरेको छ । दुवै अध्यक्षबीच भएको छलफलपछि आज बिहान ९ बजे बस्ने एकता संयोजन समितिको बैठकले सबै विषयको टुंगो लगाउने एमाले स्थायी कमिटीको बैठकले निष्कर्षसहित वैशाख ९ गते नै पार्टी एकता गर्ने निर्णय गरेको नागरिक दैनिकमा मणि दाहालले लेखेको समाचारमा उल्लेख छ ।
कान्तिपुर दैनिकले पनि एमाले स्थायी कमिटीको बैठक सम्बन्धी समाचारलाई पहिलो पृष्ठमा स्थान दिएको छ । एमालेले पार्टीको ‘पोजिसन’अनुसार एकता गर्न प्रस्ताव गरेको छ भने माओवादी बराबर हैसियतमा एकता गर्नुपर्ने अडानमा रहेको समाचारमा उल्लेख छ ।
गोरखापत्र दैनिकले ओली र दाहालबीचको छलफल सकारात्मक भन्ने शीर्षकमा पहिलो पृष्ठमै समाचार प्रकाशित गरेको छ ।
नयाँ पत्रिका दैनिकले दुई अध्यक्षबीच अढाइ घन्टा छलफल भन्ने शीर्षकमा समाचार प्रकाशित गरेको छ भने एमालेको बैठकले आशंका हटाएर ९ वैशाखमै एकता गर्ने निर्णय गरेको पनि समाचारमा उल्लेख छ ।
राजधानी दैनिकले पनि यो समाचारलाई विशेष महत्त्वका साथ प्रकाशित गरेको छ । टुट्यो संवादहीनता भन्ने शीर्षकमा राजधानी दैनिकमा प्रकाशित समाचारअनुसार केहीदिन यता देखिएको संवादहीनता टुटेलगत्तै एकता प्रक्रियाले गति लिएको उल्लेख छ ।
अन्नपूर्ण पोस्टले मुद्दा फेरि संयोजन समितिमा शीर्षकमा लेखेको समाचारमा माओवादी केन्द्रका अध्यक्ष पुष्पकमल दाहालले प्रधानमन्त्री एवम् नेकपा एमालेका अध्यक्ष केपी शर्मा ओलीलाई पार्टीभित्र आफूलाई परेको अप्ठेरो बुझिदिन आग्रह गरेका थिए । जवाफमा ओलीले आफू त्याग गर्न सक्ने नेता भएको धारणा राखेका थिए ।
अन्य समाचार
आजको नागरिक दैनिकमा ओली लम्पसारवादी : देउवा शीर्षकमा समाचार प्रकाशित गरिएको छ । दोस्रो पृष्ठमा प्रकाशित समाचारमा भनिएको छ – नेपाली कांग्रेसका सभापति शेरबहादुर देउवाले नेकपा एमालेका अध्यक्ष एवम् प्रधानमन्त्री केपी शर्मा ओली लम्पसारवादी भएको आरोप लगाएका छन् ।
नेपाल तरुण दलद्वारा हेटौंडामा आयोजित प्रशिक्षण सोमवार उद्घाटनपछि ओलीको खोक्रो राष्ट्रवाद भारतमा गएपछि लम्पसारवादमा परिणत भएको दाबी गरे । “लम्पसारवादीले नै राष्ट्रवादको चर्को कुरा गर्ने ?” देउवाले भने, “अब स्पष्ट भइसक्यो । ओली भन्ने मान्छे कहिल्यै राष्ट्रवादी थिएनन्, लम्पसारवादीमात्रै हुन् ।”
यसैबीच कान्तिपुर दैनिकमा कुलचन्द्र न्यौपानेले लेखेको समाचार टिप्पणीअनुसार नेपाली कांग्रेसका नेता रामचन्द्र पौडेललाई आफ्नै समूह सम्हाल्न सकस परेको छ । निर्वाचन हार्नुमा पार्टी सभापति शेरबहादुर देउवाको कार्यशैली र भूमिकालाई मुख्य जिम्मेवार ठहर्याएर अग्रिम महाधिवेशनको आवाज उठाइरहेका बेला पौडेललाई नेतृत्वका आकांक्षी आफ्नो समूहका नेता व्यवस्थापनमा चुनौती देखिएको हो । महामन्त्री शशांक कोइरालाको भूमिका पौडेलको मुख्य टाउको दुखाइ बनेको समाचारमा उल्लेख छ ।
आजको कान्तिपुर दैनिकले पहिलो पृष्ठमा बिस्केट जात्राका अवसरमा सोमवार राजधानीको टोखास्थित नारायण पोखरीमा विभिन्न देवीदेवताका मूर्तिसहितका खटलाई महास्नान गराइँदै गरेको तस्बिर प्रकाशित गरेको छ भने साल्ट ट्रेडिङमा वैदेशिक अनुदान–डेढ अर्बको सेयर घोटाला शीर्षकमा अर्को समाचार प्रकाशित छ ।
साल्ट ट्रेडिङ कर्पोरेसन्स लिमिटेडमा करिब डेढ अर्बको सेयर घोटाला गरिएको खुलासा भएको समाचारमा उल्लेख छ । जापान र भारतबाट प्राप्त अनुदान १ अर्ब ४० करोड सेयरमार्फत घोटाला भएको समाचारमा जनाइएको छ । यो समाचार राजु चौधरीले लेखेका छन् ।
नागरिक दैनिकले नेपाल ट्रस्टको जग्गा भाडामा दिँदै अनियमितता भएको पाइएको समाचारलाई विशेष प्राथमिकताका साथ प्रकाशित गरेको छ । पाँच अर्ब रुपैयाँ घोटाला भएको महालेखा परीक्षकको प्रतिवेदनमा उल्लेख भएको समाचारमा जनाइएको छ भने बक्समा प्रकाशित अर्को समाचारअनुसार स्वास्थ्यमा पनि अर्बौं हिनामिना भएको महालेखाको प्रतिवेदनले औंल्याएको उल्लेख छ ।
गोरखापत्र दैनिकले परराष्ट्रमन्त्री चीन प्रस्थान, समालोचक डा. कुमारबहादुर जोशीको निधन, देउवाले चितवनमा सञ्चारकर्मीसँग बोलेका विषयलाई पहिलो पृष्ठमा प्रकाशित गरेको छ ।
अन्नपूर्ण पोस्टमा कर्मचारी सन्ततीको छात्रवृत्तिमा पौने अर्ब खर्च– उपलब्धि शून्य शीर्षकमा समाचार प्रकाशित गरेको छ । सागर पण्डितले लेखेको समाचारमा भनिएको छ – सरकारले कर्मचारीका सन्तानलाई छात्रवृत्तिमा करोडौं लगानी गरे पनि उनीहरुलाई सरकारी सेवामा आकर्षित गर्नसकेको छैन ।
दृष्टिकोण र विचार
आजको अन्नपूर्ण पोस्टमा निहार आर. नायकको विचार प्रकाशित छ । सम्बन्ध सुधार्नैपर्ने कारण शीर्षकमा नायकले आफ्नो विचारमा भनेका छन् – प्रधानमन्त्री ओलीको भ्रमणको मुख्य उद्देश्य नेपालले नयाँ संविधान जारी गरेपछि र त्यसका बारेमा भारतले देखाएका चासोका कारण द्विपक्षीय सम्बन्धमा देखिएको अविश्वास हटाउनु थियो ।
प्रमको आशलाग्दो ६० दिन शीर्षकमा आजको नागरिक दैनिकमा पुरञ्जन आचार्यको विचार प्रकाशित छ । प्रमको राष्ट्रको नाममा सम्बोधन गर्ने स्थल जनकपुर वा वीरगन्ज भएको भए राष्ट्रिय ऐक्यवद्धतामा थप बल मिल्थ्यो कि ? यस्तै साना र मसिना कुराले राष्ट्रिय एकता र नेपालको अखण्डता बलियो गर्न मद्दत मिल्छ ।
प्रदेश सञ्चालनका अन्योल शीर्षकमा आजको कान्तिपुर दैनिकमा डा. खिमलाल देवकोटाको दृष्टिकोण प्रकाशित छ । उनका अनुसार प्रादेशिक सरकारले अन्योल तथा द्विविधा समयमै चिर्न सकिएन भने हाम्रो संघीयताले राम्रोसँग काम गर्न सक्दैन ।
सम्पादकीय
अन्नपूर्ण पोस्टले राज्य अभिभावक बनोस् शीर्षकमा सम्पादकीय लेख्दै भनेको छ – प्रधानमन्त्री र मन्त्रीहरुले अमुक विद्यार्थीको अभिभावकत्व ग्रहण गर्नु सुन्दर पक्ष हो । तर, राज्य नै अभिभावक बन्न त्यसभन्दा बढी आवश्यक छ ।
स्थानीय तहमा पाठ्यक्रम अनिवार्य शीर्षकमा राजधानी दैनिकले सम्पादकीय लेखेको छ ।
स्वास्थ्य क्षेत्रमा सुधार शीर्षकमा नयाँ पत्रिका दैनिकले सम्पादकीय लेखेको छ । सम्पादकीयमा भनिएको छ– जहिलेसम्म सरकारी अस्पताल र स्वास्थ्य केन्द्रहरु जिम्मवाररुपमा सेवा दिने विश्वसनीय संस्था बन्दैनन् तहिलेसम्म साधारण नागरिकको पहुँचमा स्वास्थ्य सेवालाई पुर्याउन सकिन्न ।
नागरिक दैनिकले अख्तियारको तेस्रो आँखा शीर्षकमा सम्पादकीय लेखेको छ । राष्ट्रिय ढुकुटीमाथि घात गर्ने अख्तियार दुरुपयोगकर्तामाथि सशक्त कारबाही नहुने हो भने आउँदा कैयन् वर्ष हामीले अनियमितताका यिनै समाचार दोहोर्याइरहनेछौंँ । अख्तियार दुरुपयोग अनुसन्धान आयोग निद्राबाट कहिले ब्युँझिने ?
कान्तिपुर दैनिकले विद्यार्थी टिकाउने चुनौती शीर्षकमा सम्पादकीय लेखेको छ ।
फाइल तस्बिर