काठमाडौं । सरकारले प्रहरी प्रमुखमा डीआईजी सर्वेन्द्र खनाललाई नियुक्ति गरेपछि अर्का डीआईजी रमेश खरेलले असन्तुष्टि व्यक्त गर्दै राजीनामा दिने घोषणा गरेका छन् ।

प्रहरी प्रमुखका लागि खनालसँगै खरेल र पुष्कर कार्की प्रतिष्पर्धामा थिए । मंगलबार बेलुका बसेको मन्त्रिपरिषद् बैठकले खनाललाई प्रहरी महानिरीक्षकमा बढुवा गर्ने निर्णय गरेपछि खरेलले असन्तुष्टि जनाएका हुन् ।

तर उनले खनालप्रति कुनै आग्रह/पूर्वाग्रह नभएको बताएका छन् । “प्रहरीमा भागबन्डाको पद्धति अन्त्य हुनुपर्छ भन्ने मेरो धारणा हो,” डीआईजी खरेलले बाह्रखरीसँग संक्षिप्त कुरा गर्दै बुधबार बिहान भने, “प्रहरीमा म जागिर खानकै लागि मात्र बसेको होइन, केही ड्रिम प्रोजेक्ट थिए । त्यो पूरा गर्ने मेरो इच्छा थियो तर त्यो जिम्मेवारीमा नरहेपछि अब राजीनामा दिने निर्णयमा पुगेको छु । मैले आजै राजीनामा दिन्छु ।”

उनले राजीनामापछिको कुनै योजना नबनाएको पनि धारणा राखे ।
तस्बिर, फेसबुकबाट