खेल

खेलाडीले पाएनन् पुरस्कार, आयोजकको उल्टै धम्की

खेलाडीले पाएनन् पुरस्कार, आयोजकको उल्टै धम्की

काठमाडौं । इम्प्याक्ट ओपन ठमेल टेबल टेनिस च्याम्पियनसिपका विजेता खेलाडी तथा टिमले अहिलेसम्म पनि पुरस्कार नपाएको गुनासो गरेका छन् । प्रतियोगिता सकिएको ४ महिनाभन्दा बढी बितिसक्दा पनि आयोजकले पुरस्कार नदिई उल्टै धम्क्याइरहेको उनीहरुको भनाइ छ । 

इम्प्याक्ट स्पोर्टस् म्यानेजमेन्टले गत वर्षको डिसेम्बर ३ देखि ११ तारिखसम्म लैनचौरस्थित अखिल नेपाल टेबल टेनिस प्रशिक्षण केन्द्रमा इम्प्याक्ट ओपन ठमेल टेबल टेनिस च्याम्पियनसिप आयोजना गरेको थियो । च्याम्पियनसिपका विजेता खेलाडीले अहिलेसम्म पुरस्कारबापतको रकम पाएका छैनन् । इम्प्याक्ट स्पोर्टस् म्यानेजमेन्टका सञ्चालक स्वरेज वन्तले पैसा नदिई उल्टै धम्क्याउने गरेको खेलाडीले बताएका छन् । 

टिम इभेन्ट्समा नेपाल पुलिस क्लब विजेता बनेको थियो । विजेता बनेस्वरुप नेपाल पुलिस क्लबले पाउनुपर्ने रकम अहिलेसम्म पाएको छैन । त्यस्तै महिला सिंगल्समा नेपालकी नम्बर एक खेलाडी नविता श्रेष्ठ प्रथम भएकी थिइन् । उनले पनि अहिलेसम्म पुरस्कार नपाएको बताएकी छन् । 

विजेता टिम तथा खेलाडीले नपाएको रकम
नेपाल पुलिस क्बल (टिम इभेन्ट्स विजेता) – ४०,०००
नविता श्रेष्ठ (महिलातर्फ सिंगल्स विजेता) – २५,०००
स्वेच्छा नेम्बाङ (महिलातर्फ सिंगल्स तेस्रो) – १०,०००
दीप साउन (पुरुषतर्फ सिंगल्स दोस्रो – १५,०००
पुरुषोत्तम बज्राचार्य (पुरुषतर्फ सिंगल्स तेस्रो) – १०,०००
अन्जु सुवाल (यु–१८ गल्र्स सिंगल तेस्रो) – ५,०००

इम्प्याक्ट स्पोर्टस् म्यानेजमेन्टले खेलाडीको मात्रै नभएर अम्पायर, टेक्निकल कमिटि र साउण्ड सिस्टमको पनि रकम नदिएको बताइएको छ । 

अम्पायर – ५८,०००
टेक्निकल कमिटि – २७,०००
साउण्ड सिस्टम – ८०,०००

खेलाडीको मात्रै आयोजकले १ लाख ५ हजार पुरस्कारबापतको रकम दिन बाँकी छ । त्यस्तै, अम्पायर, टेक्निकल कमिटि र साउण्ड सिस्टमको गरी १ लाख ६५ हजार आयोजकले तिर्न बाँकी रहेको छ । आयोजकले कुल २ लाख ७० हजार रुपैयाँ नदिएको बताइएको छ । 

राष्ट्रिय खेलाडी दीप साउनले आयोजक ठग भएको प्रतिक्रिया दिए । उनले भने “गेमचाहिँ गरायो । चेक पनि दियो तर ब्यालेन्स नभएको । त्यसपछि हामीले सोध्दा एक दुई दिनपछि ब्यालेन्स हाल्छौं, त्यसपछि साट्नु भन्ने गर्नुहुन्थ्यो । यसरी नै झुलायो । अहिले त फोन पनि उठाउँदैन । केही प्रतिक्रिया पनि दिँदैन ।”

सञ्चालक स्वरेज वन्तले ३ पटकसम्म चेक दिएको र तीनै पटक बाउन्स भएको दीपले बताए । दीपले थपे, “इम्प्याक्ट स्पोर्टस् म्यानेजमेन्टका सञ्चालकसँग एक पटक भेट भएको थियो । पैसा भयो भने दिन्छु, चुप लागेर बस । जुन बेला पैसा हुन्छ, त्यो बेला दिन्छु । कराए दिन्न भनेर थर्काए ।”

राष्ट्रिय खेलाडी रविना महर्जनले पनि टेक्निसियनको रुपमा काम गरे पनि पारिश्रमिक नपाएको गुनासो गरिन् । 

इम्प्याक्ट स्पोर्टस् म्यानेजमेन्टका सञ्चालक स्वरेज वन्तसँग यो विषयबारे बुझ्नका लागि पटक–पटक प्रयास गर्दा पनि सम्पर्क हुन सकेन ।

तपाईंको मत