एजेन्सी । फुटबलको नियमनकारी विश्व फुटबल महासंघले फ्रान्सेली खेलाडीमाथि भएको रंगभेदको घटनामा अनुसन्धान थालेको छ । विश्वकपको तयारीमा रहेका रुस र फ्रान्सबीचको खेलको दौरानमा फ्रोन्सेली दुई खेलाडीमाथि रंगभेद भएको थियो ।
सेन्ट पिटरर्सबर्गस्थित क्रेस्टोभ्स्की स्टेडियममा गतसाता भएको अन्तर्राष्ट्रिय मैत्रीपूर्ण खेलमा घरेलु टोली रुसविरुद्ध फ्रान्सले ३–१ गोलअन्तरले जित हात पारेको थियो । खेलकै दौरानमा फ्रान्सका खेलाडी पाउल पोग्बा र ओस्मन डेम्बेले रंगभेदको सिकार बनेको समाचार बाहिर आएको थियो ।
फ्रान्सले रुसविरुद्ध कर्नर प्रहार गर्नै लाग्दा रुसी समर्थकले रंगभेदको नारा लगाएको बीबीसीले जनाएको छ । बीबीसीले समाचारमा जनाएअनुसार फ्रान्सका खेलकुदमन्त्री लाउरा फ्लेसेलले रंगभेद फुटबलमा कहिले नदेखिनुपर्ने बताएका छन् ।
खेलकुद मन्त्री फ्लेसेलले भनेका छन् “रंगविभेदलाई फुटबलको मैदानमा कुनै पनि ठाउँ दिनुहुँदैन । मैदानमा रंगभेदजस्ता गैरकानुनी हर्कतको अन्त्य गर्न युरोपेली युनियन र अन्तर्राष्ट्रिय समुदाय एक जुट हुनु आवश्यक छ ।” रुसमा यही वर्षको जुन १४ देखि जुलाई १५ तारिखसम्म विश्वकप फुटबल हुँदैछ । यो घटना सहि सावित भएमा रुसलाई विश्वकप आयोजना गर्न थप चुनौती देखिने भएको छ ।