एजेन्सी । विश्व नम्बर एक स्विस खेलाडी रोजर फेडेरर मायामी ओपन टेनिसको तेस्रो चरणबाट बाहिरिएका छन् । आइतबार भएको खेलमा फ्रान्सका तानासी कोकिनकिससँग पराजित हुँदै फेडेरर प्रतियोगिताबाट बाहिरिएका हुन् ।
फ्लोरिडामा भएको खेलमा फेडेरर कोकिनकिससँग ३ – ६, ६ – ३ र ७ – ६ (७ – ४) ले पराजित भए । यो हारसँगै कीर्तिमानी २० औं पटकको ग्राण्डस्लाम च्याम्पियन फेडेररले विश्व नम्बर एक वरियता गुमाउने पक्का भएको छ । शीर्ष वरियतामा राफेल नाडालले फेडेररलाई रिप्लेस गर्ने छन् । यस्तै फेडेररले यो पटकको फ्रेन्च ओपन टेनिस नखेल्ने भएका छन् ।
महिलातर्फ विश्व नम्बर एक रोमानियाकी सिमोना हालेप पनि मायामी ओपन टेनिसको तेस्रो चरणबाट बाहिरिएकी छिन् । तेस्रो चरणको खेलमा पोल्याण्डकी अजनिस्का राडवान्स्कासँग पराजित हुँदै हालेप प्रतियोगिताबाट बाहिरिएकी हुन् । ३२ औं बरियताकी राडवान्स्काले हालेपलाई ३ – ६ , ६ – २ र ६ – ३ ले पराजित गरिन् ।
मियामी ओपन अन्तर्गत नै जर्मन एन्जलिक केर्बरले चौथो चरणमा स्थान बनाएकी छिन् । केर्बरले रुसकी अनास्टासिया पाभ्लुएचेन्कोभालाई ६ – ४ र ६ – ४ को सेटमा पराजित गरेकी हुन् ।