काठमाडौं । इन्डोनेसियामा हुने १८ औँ एसियन गेम्सको तयारीका लागि नेपाली राष्ट्रिय तेक्वान्दो टोलीको छनोट गरिएको छ । नेपाल तेक्वान्दो संघले शुक्रबार सातदोबाटोस्थित संघको राष्ट्रिय प्रशिक्षण केन्द्रमा छनोट खेलको आयोजना गर्दै १० खेलाडी छनोट गरेको हो ।
एसियन गेम्सको तयारीको लागि संघले ग्यरोगीमा ८ तौल र पुम्सेतर्फ २ गरी कुल १० खेलाडी छनोट गरेको संघका केन्द्रिय सदस्य एवं प्रतियोगिता संयोजक बद्रीप्रसाद घिमिरेले जानकारी दिए । एसियन गेम्स इन्डोनेसियाको जकार्तामा अगस्ट १८ देखि २ सेप्टेम्बरसम्म आयोजना हुँदै छ । यो एसियन गेम्समा पुम्से विधा पनि समावेश हुने प्रतियोगिता संयोजक घिमिरेले जानकारी दिए ।
छनोटबाट महिलाको ग्यरोगीतर्फ ४९ केजीमुनि अस्मिता खड्का, ५३ केजीमुनिमा निमा गुरुङ र ६७ केजीमुनि संगिता बस्याल छानिएकी छिन् । पुरुषको ग्यरोगीमा ५८ केजीमा सागर गुभाजु, ६३ केजीमा बिरबहादुर महरा तथा ६८ केजीमा ज्ञानेन्द्र हमाल छनोट हुन सफल भए । बीरबहादुर गत सागको रजत पदक र पराजित निश्चलमान कांस्य पदक विजेता हुन् ।
पुरुषको ८० केजीमा सक्षम कार्की र ८७ केजीमाथि अनुज पुजारी छनोट भए । पुम्सेतर्फ महिलामा पार्वती गुरुङ तथा पुरुषमा कमल श्रेष्ठ छनोट भए ।