एजेन्सी । पूर्व विश्व नम्बर एक अमेरिकी सेरेना विलियम्स मायामी ओपन टेनिसको पहिलो चरणबाट बाहिरीएकी छिन् । बुधबार राति भएको पहिलो चरणको खेलमा जापानकी नाओमी ओसाकासँग पराजित हुँदै सेरेना प्रतियोगिताबाट बाहिरिएकी हुन् ।

फ्लोरिडामा भएको खेलमा ओसाकाले सेरेनालाई ६ – ३ र ६ – २ को सेटमा पराजित गरेकी हुन् । गत सातामात्र इन्डियन वेल्सको उपाधि जितेकी नाओमी ओसाकाले अब चौथो बरियता प्राप्त युक्रेनी एलिना स्विटोलिनासँग खेल्ने छिन् ।

आमा बनेको ६ महिनापछि टेनिस कोर्टमा फर्किएकी सेरेनाको यो दोस्रो प्रतियोगिता हो । यसअघि सेरेनाले इन्डियन वेल्स खेल्दै टेनिस कोर्टमा फर्किएकी हुन् । उक्त प्रतियोगितामा सेरेना तेस्रो चरणसम्म पुगेकी थिइन् । सेरेनाले गत सेप्टम्बरमा छोरी एलेक्सिस ओलम्पिया ओहानियनलाई जन्म दिएकी थिइन् ।