बीबीसी । नाइजेरियाको दापचीमा बोकोहरामको अपहरणमा परेका छात्राहरु घर फिर्ता भएका छन् । ११० मध्ये ७६ छात्राहरु मुक्त भएको तर बाँकीको अवस्थाबारे भने कुनै जानकारी नभएको नाइजेरियाको सूचना मन्त्रालयले बताएको छ । स्थानीयवासीहरुले बीबीसीलाई जानकारी दिँदै विद्यालयबाट अपहरित भएका छात्राहरु बुधबार बिहान फेला परेको बताएका छन् ।
एक महिना अगाडि बोको हरामले विद्यालयमा गरेको आक्रमणपछि उनीहरु हराएका थिए । गत १९ फेब्रुअरीमा दापचीमा भएको यस घटनामा पहिले त सबै छात्राहरु भाग्न सफल भएको बताइएको थियो तर लामो समयसम्म पनि उनीहरु घर नफर्किएपछि बोको हरामले अपहरण गरि लगेकोे थाहा भएको थियो । 

नाइजेरियाका राष्ट्रपति बुहारीले यस घटनालाई राष्ट्रिय संकटको अवस्था बताउँदै पीडितका परिवारसँग माफी माग्दै दुःख व्यक्त गरेका थिए ।

अपहरणमा परेका छात्रा मध्ये एकका अभिभावकले बताए अनुसार आतङ्ककारी समूहका एक लडाकूले बिहान गाडीमा आएर छात्राहरुलाई छाडेर गएका हुन् । यसरी छात्राहरुलाई त्यहाँ छाडेर ती ब्यक्ति तुरुन्तै फर्किएको बताइएको छ । अपहरणमा परेकमा छात्राहरु भने थाकेको अवस्थामा देखिएपनि घर फर्कन सकेको बताइएको छ । अर्का एक अभिभावकले पनि अपहरणमा परेकी छोरीसँग फोनमा कुरा गरेको जानकारी दिएका समाचारमा उल्लेख छ ।