काठमाडौं । काठमाडौं महानगरपालिका १० देवीनगर (बानेश्वर) मा एक व्यक्तिको हत्या भएको छ ।
मंलबार राति मदिरा सेवन गरेको एक समुहले सर्लाही हजारीया स्थायी ठेगाना भइ काठमाडौंमा मामासँगै बस्दै आएका २३ वर्षीय पुरुषोत्तम सेढाईको हत्या गरेको हो ।
मृतक सेढाईका मामा श्याम हुमागाईका अनुसार उनी २ वर्षदेखी सनराइज बैंकमा ‘डाटा इन्ट्री’ को काम गरिरहेको जानकारी दिएका छन् ।
“भैरहवा जाने भएपछि भान्जाले आफ्ना केही साथीलाई कोठामै बोलाएर खानपिन गराइरहेका थिए, छुट्टिने बेलामा नजिकै बस्ने मजदुरहरुसँग के भयो,उनीहरुले छुरा हानेर हत्या गरेछन्,” मृतकका मामा श्यामले भने ।
तर सनराइज बैंकले भने उनी बैंकमा कार्यरत नभएको बताएको छ । बैंककी एचअार विभाग प्रमुख पार्वती विष्टले सेढाइँ सनराइज बैंकको कर्मचारी नभएको स्पष्ट पारिन् ।
स्रोतका अनुसार हत्या गर्ने व्यक्तिहरु एक ठेकेदारका लागि मजदुरका रुपमा काम गर्दै आएका थिए । हत्या गर्ने मजदुरहरुले पनि मापसे गरेको देखिएको प्रहरी स्रोतले जनाएको छ ।
महानगरिय प्रहरी वृत बानेश्वरका डीएसपी रवि कुमार पौडेलले छुरा प्रहार भएपछि सेढाईको त्रिवि शिक्षण अस्पताल महाराञ्जमा उपचारका क्रममा मृत्यु भएको बताए ।
घटनामा संलग्न तीन जनालाई पक्राउ गरिएको प्रहरीले जनाएको छ । पक्राउ परेकाहरूमा गोपाल लिम्बु, रोहित चाैधरी, अशोक लिम्बु रहेका छन् । घटनामा संलग्न एकजना फरार छन् ।
*सच्याइएको
