चितवन । सरकारले २० वर्ष पुरानो गाडी चलाउन निषेध गरेसँगै चितवनमा पनि प्रहरी प्रशासनले अवधि पूरा गरेका गाडीहरु नियन्त्रणमा लिन थालेको छ ।
प्रहरी प्रवक्ता डीएसपी प्रभुप्रसाद ढकालका अनुसार बिहीबार पहिलो दिनमा पाँच ठूला गाडी नियन्त्रणमा लिइएकोमा दुई ट्रक र तीन बस रहेका छन् । तीन बसमध्ये एउटा पुरानो स्कुल बस रहेको उनले जानकारी दिए ।
डीएसपी ढकाल भन्छन्, “जिल्लाभरि सबै प्रहरी युनिटलाई २० वर्ष पुराना गाडी नियन्त्रणका लागि निर्देशन दिएका छौँ । नियन्त्रणमा लिइएका गाडीहरु केही दिनपछि यातायात व्यवस्था कार्यालयलाई बुझाइने छ ।”
व्यवसायी आफैँले पुराना गाडी बुझाउँदा सकारात्मक सन्देश जाने भएकाले पहिलो प्राथमिकतामा अनुरोध गरिएको उनले बताए ।
चितवन ट्राफिक प्रहरी प्रमुख प्रहरी निरीक्षक सन्तोष पन्तले अवधि पुगेका कुनै पनि सवारी साधनलाई नछाडिने बताएका छन् । उनी भन्छन्, “चितवनमा पनि सयौँको संख्यामा २० वर्ष पुराना गाडी रहेका छन् । राज्यले चालेको अभियानमा व्यवसायी सहयोगी बन्नुपर्छ ।”
फागुनमा नवीकरण चैतमा जफत
ना १ ख ६९७४ नम्बरको ट्रक पराल बोकेर पोखरा जाँदै थियो । तर, चितवन प्रहरीले कागजपत्र चेकजाँच गर्दा उक्त ट्रक २४ वर्ष पुरानो भएको पत्ता लाग्यो ।
गाडीमा ओभरलोड देखेर रोकेजस्तो माने चालकले, चालकले सबै कागजपत्र दुरुस्त रहेको बताए तर पुरानो गाडी चलाउन पाइदैन भन्दै गाडी प्रहरी कार्यालयभित्र हुलेपछि चालक दंग परे । प्रहरीले नियन्त्रणमा लियो ।
गाडी २४ वर्ष पुरानो हो तर केही महिनाअघि मात्र यातायात व्यवस्था कार्यालयमा ट्रक पुनः नवीकरण (रिन्यू) भएको थियो । यही फागुन ६ गते नवीकरण भएको कागजपत्र ट्रक चालकले देखाए पनि प्रहरीले छाडेन । २०७४ मंसिर ४ गते यातायात कार्यालय भरतपुरमा ट्रक जाँच भएको उल्लेख छ ।
सरकारको नीतिबारे व्यवसायीहरु रुष्ट भएका छन् ।
नेपाल राष्ट्रिय यातायात व्यवसायी महासंघका केन्दीय उपाध्यक्ष राम सुवेदीले गाडीको वार्षिक समय अवधिभन्दा पनि कुन गाडी कति धेरै (किमी) गुडेको छ त्यसको आधारमा चलाउन रोक लगाउनुपर्ने बताए ।
उपाध्यक्ष सुवेदी भन्छन्, “सरकार आफैँ पुराना गाडी धमाधम नवीकरण गर्ने अनि पुरानो भयो अब थन्काउ भनेर व्यवसायीलाई भन्ने यो दोहोरो नीति भयो ।”