काठमाडौं । नेपालमै पहिलोपटक खुलेको खुला विश्वविद्यालयले आफ्नो पहिलो ब्याचका लागि भर्ना आवेदन आह्वान गरेको छ ।

विश्वविद्यालयका उपकुलपति प्राडा लेखनाथ शर्माले २०७४–०७५का लागि सेमेष्टर प्रणाली अन्तर्गत भर्ना आवेदन बुधबार (आज) बाट आह्वान गरिएको जानकारी दिए । सामाजिक शास्त्र तथा शिक्षा संकाय र विज्ञान, स्वास्थ्य तथा प्रविधि संकाय अन्तर्गत विभिन्न लेभलका भर्नासम्बन्धी सूचना प्रकाशित गरिएको जानकारी उनले दिए । 

शर्माका अनुसार आवेदन दिने अन्तिम मिति ०७४ चैत २१ गतेसम्म छ । विश्वविद्यालयको केन्द्रीय कार्यालय वा वेबसाइट www.nou.edu.np बाट आवेदन फारम डाउनलोड गरेर admission@nou.np मा पठाउन सकिनेछ । 

विश्वविद्यालयले दिएको जानकारीअनुसार फारम भर्न एक हजार शुल्क लाग्ने छ । विश्विद्यालयका नाममा रहेको राष्ट्रिय वाणिज्य बैंक सानोठिमी शाखामा गएर जम्मा गर्न सकिन्छ भने अनलाइन आवेदन भर्नेहरुका लागि नगदी भौचर स्क्यान गरी आवेदन फारमसँगै संलग्न गर्न सकिनेछ ।

उपकुलपति शर्माले यस वर्षका लागि सामाज शास्त्र अन्तर्गत अर्थशास्त्र, राजनीति शास्त्र र सोसोलोजीमा एमफिलको १.५ अर्थात् १ वर्ष ६ महिनाको कार्यक्रम ल्याइएको बताए । उनले शिक्षा संकायमा पनि डेढ वर्षे कोर्षमा एमफिलको कोर्ष रहेको बताए । जसअन्तर्गत अंग्रेजी, स्वास्थय, शिक्षा, सोसल साइन्स, गाणित तथा नेपालीको पढाइ हुनेछ ।

त्यस्तै पोस्ट ग्रेजुएट डिप्लोमा डिस्टेन्स एण्ड इ–लेभलमा एक वर्षे कार्यक्रमका लागि आवेदन आह्वान गरिएको छ । यस्तै लाइब्रेरी इन्फरमेशन मेनेजमेन्टका लागिसमेत एक वर्षे कोर्ष ल्याइएको छ ।

विश्वविद्यालयले जनाएअनुसार विज्ञान, स्वास्थ्य तथा प्रविधि संकाय अन्तर्गत आइसीटीमा डेढ वर्षे एमफिलको कोर्ष ल्याइएको छ भने ई–गभर्नेन्समा स्नातकोत्तरसम्मको कोर्ष लागि भर्ना खुला गरिएको छ ।