काठमाडौं । सोमबार यूयस बंगलाको विमान दुर्घटना भएपछि त्यसबारे जानकारी लिन नेपाल आएका बंगलादेशका नागरिक उडड्यन तथा पर्यटन मन्त्री एकेएम शाहाजहाँ कमालले प्रधानमन्त्री केपी ओलीसँग भेट गरेका छन् ।
बुधबार (आज) भएको भेटमा प्रधानमन्त्री ओलीले विमान दुर्घटनाबाट आफू पनि स्तब्ध रहेको बताएका थिए । साथै विमान दुर्घटनामा निधन भएकाहरुको शोकमा परेका बंगलादेशका प्रधानमन्त्री, सरकार र जनतालाई समवेदनासहित सहानुभूति प्रकट गरेका छन् । प्रधानमन्त्रीले घटनाको छानविनका लागि सरकारले जाँचबुझ आयोग गठन गरेको जानकारी समेत गराएका छन् ।
बंगलादेशका पर्यटन मन्त्रीले नेपाल सरकारले विमान दुर्घटनापछि घाइतेको उद्धार र उपचारमा देखाएको सक्रियताको प्रशंसा गरेका छन् । सोमबार बंगलादेशको राजधानी ढाकाबाट उडेकोे युएस बंगला एयरलाइन्सको विमान त्रिभुवन अन्तर्राष्ट्रिय विमानस्थलमा दुर्घटना भएको अर्कोदिन मंगलबार (हिजो) मन्त्री शाहाजहाँ कमाल नेपाल आएका हुन् ।