एजेन्सी । इंग्लिश क्लब म्यानचेस्टर युनाइटेड युईएफए च्याम्पियन्स लिग फुटबलको अन्तिम १६ बाट बाहिरिएको छ । मंगलबार राति भएको अन्तिम १६ को दोस्रो लेगमा स्पेनिस क्लब सेभियासँग २ – १ ले पराजित हुँदै युनाइटेड प्रतियोगिताबाट बाहिरिएको हो ।
युनाइटेडको घरेलु मैदानमा भएको दोस्रो लेगमा विसाम बेन यडर चम्कदा सेभियाले च्याम्पियन्स लिगको क्वाटरफाइनलमा स्थान बनाएको हो । सेभियाको जितमा दुवै गोल यडरले गरेका थिए । युनाइटेडका रोमेरो लुकाकुले एक गोल फर्काए । यो जितसँगै सेभियाले समग्रमा २ – १ को जितसहित च्याम्पियन्स लिगमा नकआउट चरणमा स्थान बनाएको हो । सेभियाको मैदानमा भएको पहिलो लेग गोलरहित बराबरीमा सकिएको थियो ।
ओल्ड ट्राफोर्डमा बल पोजिसनमा पकड जमाएपनि युनाइटेड सेभियासँग स्तब्ध बनेको हो । पहिलो हाफ गोलरहित बराबरीमा सकिएको खेलको ७४ औं मिनेटमा यडरले गोल गर्दै सेभियालाई सुरुवाती अग्रता दिलाए । त्यसको चार मिनेट पछि ७८ औं मिनेटमा यडरले व्यक्तिगत दोस्रो गोल गर्दै सेभियालाई २ – ० को अग्रता दिलाए । खेलको ८४ औं मिनेटमा लुकाकुले एक गोल फर्काएपनि युनाइटेडको हार टार्न सकेनन् ।