काठमाडौं । सशस्त्र प्रहरी महानिरीक्षक पाँचौं राष्ट्रिय खुल्ला महिला भलिबलमा आयोजक एपीएफले लगातार दोस्रो जित निकालेको छ ।
हल्चोकस्थित एपीएफको भलिबल कोर्टमा मंगलबार भएको दोस्रो खेलमा ढोरपाटन स्पोर्ट्स क्लबलाई पराजित गर्दै एपीएफले लगातार दोस्रो जित दर्ता गरेको हो । एपीएफले ढोरपाटनलाई २५–८, २५–५ र २५–९ को सेटमा पराजित गर्यो । एपीएफले सोमबार नेपाल पुलिस क्लबलाई पराजित गरेको थियो ।
मंगलबार नै भएको अर्को खेलमा त्रिभुवन आर्मी क्लबले जावलाखेल भलिबल प्रशिक्षण केन्द्रलाई २५–१०, २५–१८ र २५–१५ को सोझो सेटमा पराजित गरेको छ । लिगकम नकआउटको आधारमा जारी प्रतियोगितामा ६ महिला भलिबल क्लबले सहभागिता जनाएका छन् ।
एपीएफ क्लबको आयोजनामा जारी चौधौं राष्ट्रव्यापी कृष्णमोहन स्मृति खुल्ला व्याडमिन्टनतर्फको महिला एकलमा फाइनलमा त्रिभुवन आर्मीका नङ्सलादेवी तामाङ र आर्मीकै रसिला महर्जनले प्रतिस्पर्धा गर्ने भएकी छिन् । सेमीफाइनल नङ्सलादेवीले एपीएफका शोभा गौचनलाई २१–१२ र २१– १३ ले पराजित गर्दा रसिलाले झापाका जेसिका गुरुङ्गलाई २१–१३ र २१– १७ ले हराइन ।
व्याडमिन्टनकै पुरुष एकलतर्फ त्रिभुवन आर्मीका रत्नजित तामाङले आर्मीकै प्रफुल्ल महर्जनलाई २१–११ र २१– ८, दार्चुलाका प्रिन्स दाहालले भोजपुरका बिकास श्रेष्ठलाई २१–१८ र २१– १८ , आर्मीका नविन श्रेष्ठले एपीएफका साजनकृष्ण ताम्राकारलाई २१–१९ र २१– १२ ले तथा एपीएफका दिपेश धामीले एपीएफकै विजित थापामगरलाई २१–१९ र २१– ११ ले पराजित गर्दै सेमीफाइनलमा स्थान पक्का गरेका छन् का छन् ।
यस्तै दशौं सहवीर स्मृति खुल्ला लनटेनिस प्रतियोगिता पुरुष एकलतर्फको क्वार्टरफाइनल खेलमा ललितपुरका सन्तोष खत्रीले पोखराका अनिल शाहीलाई ६–३ र ६–० ले र ललितपुरका जितेन्द्र परियारले नेपाल पुलिस क्लवका कमल भण्डारीलाई १–६, ६–१ र ७–५ ले हराउदै सेमिफाइनलमा स्थान बनाएका छन् । त्यस्तै बुटवलका विकाश खड्का रिटायर्डहर्ट हुँदा पोखराका प्रदिप खड्काले र ललितपुरका प्रणव खनालले काठमाडौंका मानबहादुर कटुवाललाई ६–१ र ६–१ ले पराजित गरी सेमीफाइनलमा स्थान पक्का गरे ।