काठमाडौं । बंगलादेशबाट काठमाडौं आउँदै गरेको यूएस बंगलाको विमान काठमाडौंस्थित त्रिभूवन विमानस्थलमा दुर्घटनामा परेको छ ।

अवतरणका क्रममा जहाज चिप्लिएर दुर्घटनामा परेको हो । उद्धारमा खटिएका प्रहरीका अनुसार करिब १४ जनाको जिवितै उद्धार गरिएको छ । 

विमानस्थलमा रहेका एसएसपी पूर्णचन्द्र जोशीका अनुसार दुर्घटनामा ३० जनाको मृत्यु भएको छ । २४ जना विमानस्थलमा र बाँकीको उपचारका क्रममा मृत्यु भएको उनले जानकारी दिए ।

घाइते केहीको अस्पतालमा उपचार भइरहेको छ भने उपचारमा रहेकाहरुको पनि अवस्था चिन्ताजनक रहेको छ ।

जहाज अवतरणका क्रममा दुर्घटनामा परेको प्रहरीले जानकारी गराएको छ । प्रहरीका अनुसार उक्त जहाजमा चालकदलका सदस्यसहित ७१ जना यात्रु सवार थिए ।

त्रिभूवन विमानस्थलका प्रवक्ता प्रेमनाथ ठाकुरका अनुसार ६७ जना यात्रु र ४ जना चालक दलका सदस्य थिए । 

तीमध्ये दुर्घटनामा परेर घाइते भएका १३ जनाको उद्धार गरी उपचारका लागि काठमाडौं मोडल अस्पताल, नर्भिक लगायतका अस्पतालमा लगिएको छ ।

“दुर्घटनामा परेको जहाजका केही भाग काटेर घाइतेको उद्धार जारी राखिएको छ,” ठाकुरले बाह्रखरीसँग कुरा गर्दै भने, “कति क्षति भयो भन्ने ऐकिन अझै भइसकेको छैन । नेपाली सेना, सशस्त्र र नेपाल प्रहरीले उद्धार जारी राखेको छ ।”

भिडियो : सुरज दाहाल