एजेन्सी । दक्षिण कोरियामा जारी विन्टर (शीतकालीन) ओलम्पिक खेलकुद सकिन अब दुई दिन बाँकी छ । प्योङचाङमा जारी २३ औं संस्करणको विन्टर ओलम्पिकमा आज १४ औं दिनको खेल चलिरहेको छ ।
प्योङचाङको विभिन्न १३ स्थानमा भैरहेको विन्टर ओलम्पिकको समापन आइतबार एक भव्य कार्यक्रमका बीच हुनेछ । ओलम्पिकको चौधौं दिन शुक्रबार चार स्वर्णको लागि प्रतिस्पर्धा हुँदैछ ।
विन्टर ओलम्पिकको इतिहासमै सबैभन्दा चिसो मानिएको प्योङचाङ ओलम्पिकमा १५ खेलमा १०२ पदकको लागि ३ हजार बढी खेलाडीले विभिन्न स्पर्धामा प्रतिस्पर्धा गरिरहेका छन् । हालसम्म ८९ स्वर्ण पदकको छिनोफानो भईसकेको छ ।
विन्टर ओलम्पिकको १४ औं दिनको खेल जारी रहँदा पदक तालिकामा नर्वेले अग्रता बनाइरहेको छ । नर्वेले १३ स्वर्ण, १२ रजत र १० कास्यसहित कुल ३५ पदक जितेको छ । दोस्रो स्थानको जर्मनीले १३ स्वर्ण, ७ रजत र ५ कास्य जित्दै कुल २५ पदक जितेको छ ।
यस्तै पदक तालिकाको तेस्रो स्थानमा रहेको क्यानडाले १० स्वर्ण, ८ रजत र ९ कास्यसहित कुल २७ पदक जितेको छ । चौथो स्थानको अमेरिकाले ८ स्वर्ण, ७ रजत र ६ कास्यसहित २१ पदक जित्दा नेदरल्याण्डले ७ स्वर्ण, ६ रजत र ४ कास्यसहित १७ पदक जित्दै पाँचौं स्थान ओगटेको छ ।
त्यस्तै स्विडेन, फ्रान्स र अष्ट्रियाले समान ५ – ५ स्वर्ण पदक जित्दा आयोजक दक्षिण कोरियाले ४ पदक जितेको छ । हालसम्म स्विजरल्याण्ड, जापान र इटालीले ३ – ३ स्वर्ण जित्दा बेलारुसले २ स्वर्ण जितेको छ । त्यसबाहेक चीन, चेक रिपब्लिक,स्लोभाकिया, ग्रेट ब्रिटेन, पोल्याण्ड, हंगेरी र युक्रेनले समान १ – १ स्वर्ण पदक जितेका छन् ।
यो पटक ओलम्पिकको झन्डामुनी रहेर सहभागिता जनाएको रुसका एक खेलाडीले स्वर्ण पदक जितेको छ । तटस्थ झण्डामुनी सहभागिता जनाएकी रुसकी १५ बर्षीय एलिना जागीतोभाले फिगर स्केटिङमा स्वर्ण जितेकी हुन् ।
प्योङचाङ विन्टर ओलम्पिकमा रुसका १६९ खेलाडीले तटस्थ झण्डामुनी रहेर खेलिरहेका छन् । तटस्थ झण्डामुनी रहेर ओलम्पिक खेलेका खेलाडीहरुले ५ रजत र ८ कास्यसहित कुल १४ पदक जितेका छन् ।