काठमाडौं । अभिनेता कमल हासनले आफ्नो पार्टी ‘मक्कल नीधि मय्यम’ को गठन गरेको घोषणा गरेका छन् । उनले पार्टीको झण्डा पनि अनावरण गरेका छन् । उनको पार्टीको झण्डा एकताको शक्तिको प्रतीक हो । पार्टीको नामको अर्थ हो ‘जन न्यायका केन्द्र’ ।
पार्टीको नाम घोषणाभन्दा केही अघि हासनले भने, ‘‘म तपाईको नेता होइन् ...तपाईको माध्यम हुँ ...यो सभामा सबै नेता छन् ।’’ पार्टीको नाम घोषणा अघि झण्डा अनावरण गरिएको थियो ।
हासनले पार्टीको गठन जनताको शासनको दिशामा पहिलो कदम भएको बताएका छन् । पार्टी घोषणा कार्यक्रममा अरविंद केजरीवालका साथै आम आदमी पार्टीका वरिष्ठ नेता सोमनाथ भारती, किसान नेता पी आर पांडियान पनि उपस्थित थिए ।
दिल्लीका मुख्यमन्त्री अरविन्द केजरीवालले तमिलनाडुका जनतासँग कमल हासनको पार्टीलाई मतदान गरेर कथित ‘भ्रष्ट’ दलहरु अन्नाद्रमुक तथा द्रमुकलाई पराजित गर्न आग्रह समेत गरेका छन् ।
पार्टी गठनको घोषणा अघि अभिनेता हासन रामेश्वरमस्तिथ भारतका पूर्व राष्ट्रपति एपीजे अब्दुल कलामको घर गएर आर्शिवाद लिएका थिए । हासनले पूर्व राष्ट्रपति कलामले अध्ययन गरेको विद्यालयमा पनि जाने भनिएपनि जिल्ला प्रशासनले भ्रमण राजनीतिक प्रकृतिको भन्दै अनुमति नदिएको बताइएको वेब दुनियाले जनाएको छ ।