काठमाडौं । सरकारले भूकम्पपछिको पुनर्निर्माणसम्बन्धि सम्पूर्ण जानकारी प्रदान गर्ने एप्लिकेसन ल्याएको छ । ‘प्रोजेक्ट मोनिटरिङ इन्फर्मेशन सिस्टम’ नामक उक्त एप्लिकेसनले नेपालका भूकम्प अति प्रभावित १४ जिल्लासहित सम्पूर्ण जिल्लामा भइरहेका प्रनर्निर्माण गतिविधिहरु जानकारी गराउने छ । 

पुनर्निर्माण भइरहेको स्थानमा खटिरहेका फिल्ड इन्जिनियर र फिल्ड अफिसरले यसको ड्यासबोर्डमा भइरहेको प्रगति अपलोड गराउन सक्नेछन् । साथै उक्त जानकारी विश्वको हरेक व्यक्तिले थाहा पाउन सक्नेछन् । प्राधिकरणका सहप्रवक्ता डा. भीष्म भुसालका अनुसार यस सफ्टवेयरको सम्पूर्ण आर्थिक लगानी एशियाली विकास बैंकले गरेको हो ।

बुधबार सार्वजनिक भएको यो सफ्टवेयरमा हाल अंग्रेजी भाषामात्र प्रयोग गरिएको छ । आवश्यकता अनुसार नेपाली र अन्य भाषामा सफ्टवेयर संशोधन गरिँदै लैजाने प्राधिकरणले जनाएको छ ।