एबीपी न्युज । बलिउडका नाम चलेका निर्देशक नीरज पांडेको हालै प्रदर्शनमा आएको फिल्म ‘अय्यारी’ इन्टरनेटमा लीक भएको छ । फिल्म इन्टरनेटमा लीक भएपछि फिल्मको पूरै टीम तनावमा परेको छ । यो निर्देशक नीरज पांडे सहित फिल्मका सबै कलाकारहरुका लागि ठूलो झड्का हो ।
एक सरकारी बसमा ‘अय्यारी’ फिल्मलाई बसमा सवार यात्रीलाई देखाइएको बताइएको छ । इन्टरनेटमा फिल्म लीक भए पछि निर्देशक नीरज पांडेले जनता सहित सरकारसँग ‘नो टू पायरेसी’ का लागि आग्रह गरेका छन् ।
नीरज पांडेले आपत्ति जनाउँदै ट्वीटमा भनेका छन्, “दुःखको कुरो हो, यति जागरूकताका बावजूद पनि सरकारी बसमा पायरेटेड भर्जन देखाईदै छ । यो कार्यप्रति कडा कदम उठाउने आग्रह गर्न चाहन्छु र सिधा शब्दमा नो टू पायरेसी ।’’
फिल्म गत शुक्रवारबाट सिनेमाघरहरुमा प्रदर्शन भइरहेको छ । फिल्मलाई दर्शकहरुले खासै रुचाएका छैनन् । समीक्षकहरुले पनि फिल्मलाई सामान्य भनेका छन् । यो फिल्मले प्रदर्शनको शुरूआती तीन दिनमा ११.७० करोड रुपैयाँ कमाएको थियो ।
