काठमाडौं । नेपाल विद्यार्थी संघले रौतहटका मुसहर बस्तिका बालबालिकालाई शैक्षिक सामग्री वितरण गरेको छ । धुर्मुस सुन्तली फाउन्डेसनले निर्माण गरिदिएको नमुना एकीकृत बस्तीका मुसहर बालबालिकालाई नेविसंघले शैक्षिक सामग्री वितरण गरेको हो । 

प्रजातन्त्र दिवसको अवसर पारेर प्रदेश नम्बर २ नेविसंघले आयोजना गरेको कार्यक्रममा ८० जना विद्यार्थीलाई पोशाक, एकएक दजर्न कपी, डटपेन र जामेट्री बक्स वितरण गरिएको नेविसंघका महामन्त्री सरोज थापाले जानकारी दिए । 

गरिव, विपन्न तथा सिमान्तकृत विद्यार्थीलाई सहयोग गर्दै जाने लक्ष्य अनुसार यो पटक मुसहर बालबालिकालाई सहयोग गरेको महामन्त्री थापाले बताए । नेविसंघ प्रदेश नम्बर २ ले यसअघि सप्तरीमा बाढीपिडतलाई लत्ताकपडा वितरण गरेको थियो भने स्वास्थ्य शिविर पनि सञ्चालन गरेको थियो ।

“विपन्न, सिमान्तकृत तथा गरिव विद्यार्थीलाई सहयोग गर्ने उदेश्यले हामीले सहयोग गर्दै आएका छौं । आगामी दिनमा पनि हामी यस्तै सहयोग गर्दै जानेछौं,” महामन्त्री थापाले भने ।