काठमाडौं । जिम्बाबेमा आयोजना हुने एकदिवसीय विश्वकप छनोट क्रिकेटमा पुग्न सफल नेपाली क्रिकेट टोलीलाई सरकारले नगदसहित सम्मान गर्ने भएको छ ।
नामिबियामा सम्पन्न आईसीसी विश्व क्रिकेट लिग डिभिजन टु क्रिकेटमा उपविजेता बन्दै विश्वकप छनोटमा पुगेको नेपाली टोलीलाई सरकारले जनही ३ लाख नगदले सम्मान गर्ने भएको हो । डिभिजन टु को फाइनलमा नेपाल युएईसँग ७ रनले पराजित भएको थियो ।
प्रधानमन्त्री निवास बालुवाटारमा सोमबार आयोजित एक कार्यक्रममा प्रधानमन्त्री केपी शर्मा ओलीले खेलाडीलाई जनही ३  लाख दिने घोषणा गरेको ओलीका प्रेस संयोजक चेतन अधिकारीले जानकारी दिए ।

सोही कार्यक्रममा मदन भण्डारी स्पोर्टस एकेडेमीका अध्यक्ष विनोद श्रेष्ठले पनि प्रति खेलाडी र प्रशिक्षकलाई एक–एक लाख दिने घोषणा गरेका थिए ।

सन् २०१९ मा इंग्ल्यान्ड र वेल्समा हुने विश्वकपको लागि हुने छनोट मार्च १ बाट १५ सम्म चल्नेछ । छनोटमा नेपाल समूह  बीमा रहेको छ । छनोटको समूह बी मा आयोजक जिम्बाबेसँगै नेपाल, अफगानिस्तान,  स्कटल्याण्ड र हङकङ रहेका छन् । नेपालले पहिलो खेलमा मार्च ४ मा जिम्बाबेसँग खेल्नेछ ।

छनोटको शिर्ष दुई टोलीले सन् २०१९ मा इंग्ल्यान्ड र वेल्समा हुने विश्वकपमा स्थान बनाउने छन्  । यस्तै शिर्ष तीनमा पर्ने टोलीले एकदिवसीय मान्यता प्राप्त गर्दा पुछारको दुई टोली डिभिजन टु मै झर्नेछ ।