काठमाडौं । नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालबीच भक्तपुरको सानोठिमीमा वार्ता जारी छ । पार्टी एकता मन्त्रीपरिषद्को सहमति जुटाउन दुई पार्टीका अध्यक्षबीच व्यवसायी दुर्गा प्रसाईंको घरमा वार्ता भइरहेको माओवादी केन्द्रका एक नेताले जानकारी दिए । आजको वार्ता निर्णायक हुने दाबी उनले गरे ।

माओवादी केन्द्रले पार्टी एकताको टुङ्गो लगाएपछि मात्र सरकारमा सहभागी हुने बताइरहेको छ । आफूहरु प्याकेजमै सहमति गरेर ओली नेतृत्वको सरकारमा सहभागी हुने पनि माओवादीको भनाइ छ ।  

ओली र दाहालबीचको वार्तापछि आजै पार्टी एकता संयोजन समितिको बैठक बस्ने ओलीका प्रेस संयोजक चेतन अधिकारीले जानकारी दिए । “पार्टी एकता संयोजन समितिको बैठक आज बेलुकासम्ममा बस्छ । समय र ठाउँ भने निश्चित भइसकेको छैन,” अधिकारीले भने ।