काठमाडौं । जर्मन बुन्डेस लिगा फुटबलमा साबिकको बिजेता वायर्न म्युनिखले साँघुरो जित निकालेको छ । शनिबार राति भएको खेलमा वायर्नले वुल्फवर्गलाई २–१ हराएको हो ।
वुल्फवर्गको घरेलु मैदानमा भएको खेलमा सुरुवाती अग्रता उल्टाएर वायर्नले जित निकालेको हो । लिग लिडर वायर्नलाई जित दिलाउन सान्ड्रो वाग्नर र रोबर्टो लेवान्डोस्कीले समान एक एक गोल गरे । वुल्फवर्गका ड्यानीयल डीडाभीले एक गोल गरे ।
पहिलो हाफको आठौं मिनेटमा ड्यानीयलले गोल गर्दै वुल्फवर्गलाई अग्रता दिलाएका थिए । पहिलो हाफमा १ – ० को अग्रता बनाएको वुल्फवर्गले दोस्रो हाफमा अग्रता कायम राख्न सकेन । पहिलो हाफमा एक गोलले पछि परेपनि वायर्नले दोस्रो हाफमा खेलमा फर्कदै जित दर्ता गर्यो ।
खेलको ६५ औं मिनेटमा वायर्नका वाग्नरले गोल गर्दै खेल १ – १ को बराबरीमा ल्याए । त्यसपछि खेलको ९० औं मिनेटमा लेवान्डोस्कीले गोल गर्दै वायर्नलाई २ – १ को साँघुरो जित दिलाए । लेवान्डोस्कीले पेनाल्टीमा गोल गरेका हुन् । त्यसअघि खेलको ५५ औं वायर्नका आर्जेन रोविनले पेनाल्टीमा गोल गर्न सकेनन् ।
यो जितसँगै उपाधि नजिक पुगेको वायर्नले लिगमा २१ अंकको अग्रता बनाएको छ । लिगको २३ खेल सकिदा शिर्ष स्थानको वायर्नले ५९ अंक जोडेको छ । लिगमा दोस्रो स्थानको वायर लिभरकुसेन र तेस्रो स्थानको आरबी लेपजिङको समान ३८ – ३८ अंक छ । पराजित वुल्फवर्ग २४ अंकसहित लिगको १३ औं स्थानमा छ ।