विदेश

मलेशियामा समलिङ्गीको पहिचानबारे गलत जानकारी प्रकाशन गरिएकामा आक्रोश व्यक्त

मलेशियामा समलिङ्गीको पहिचानबारे गलत जानकारी प्रकाशन गरिएकामा आक्रोश व्यक्त

काठमाडौं । मलेशियाको एक पत्रिकाले समलिङ्गी पुरुष र महिलाको पहिचान कसरी गर्ने भन्नेबारे एउटा लेख प्रकाशन गरेपछि त्यसको कडा विरोध गर्दै सबैतिर प्रदर्शन भइरहेको छ । सो लेखमा समलिङ्गी पुरुषलाई दाह«ीबाट र महिलालाई हात समाउने बानीमार्फत पहिचान गर्न सकिने जस्ता कुरा उल्लेख गरिएको बीबीसीले जनाएको छ ।

यसबारे समलिङ्गी समुदायको अधिकारका लागि सक्रिय रहेका विभिन्न संस्था र कार्यकर्ताहरुले गम्भीर आपत्ति जनाएका हुन् । यसका कारणले रूढीवादी देशका जनताको जीवन जोखिममा पर्नेबारे उनीहरुले चेतावनी दिइरहेको बताइएको छ । समलिङ्गी क्रियाकलापलाई मलेशियाको कानुन र धार्मिक परम्परा दुवैका अनुसार अनैतिक मानिन्छ । 
त्यसकारण मालेको सिनार हारियन पत्रिकामा प्रकाशन भएको सो लेखमा समलिङ्गीहरुले मद्दतका लागि धार्मिक संस्थासँग सम्पर्क राख्नुपर्ने समेत बताइएको थियो । 

तर त्यो भन्दा पनि समलिङ्गी पुरुष र महिलालाई कसरी चिन्ने भन्ने विषयमा प्रकाशन गरिएको सूचीप्रति भने धेरैले आक्रोश व्यक्त गरेका हुन् । बिना कुनै प्रमाण सो पत्रिकाले अर्थहिन र गलत जानकारी प्रकाशन गरेको भन्दै युट्युबमा समेत यसविरुद्ध थुप्रै भिडियो बनाइएको बताइएको छ । 

दाह«ी पाल्नेबाहेक समलिङ्गी पुरुषहरुले जिम जाने र अन्य पुरुषहरुमाथि नजर राख्ने, उनीहरुको लुगाप्रति पनि ध्यान दिने गरेको बताइएको छ । 

त्यस्तै समलिङ्गी महिलाहरुले भने एकअर्काको हात समातेर हिँड्ने र बारम्बार अंकमाल गरिरहने उल्लेख गरिएको थियो । तर यी सबै क्रियाकलाप सामान्य मानिसमा समेत लागु हुने भएकाले सो लेखमा धेरै कुरा गलत रहेको दाबी गर्दै अन्तर्राष्ट्रिय कार्यकर्ताले विश्वभरबाट नकारात्मक प्रतिक्रिया दिइरहेको अन्तर्राष्ट्रिय सञ्चारमाध्यमले बताएका छन् । 

विश्वका धेरै मुलुकहरुमा अझै पनि समलिङ्गीहरुको हत्या गरिने, यातना दिइने, कैद गर्ने गरेको पाइन्छ । यस्तोमा मलेशियाको पत्रिकाले प्रकाशन गरेको सो लेख धेरैका लागि खतरनाक साबित हुन सक्ने विरोधीहरुको भनाइ छ ।

पछिल्ला केही वर्षहरुमा मलेशियामा समलिङ्गी समुदायको अधिकारका लागि लडिरहेकाहरुलाई धार्मिक व्यक्तित्वका कारण बेवास्ता गरिँदै आएको बताइन्छ । यसका कारणले समलिङ्गी मानिसहरुप्रति घृणा र हिंसा बढ्दै गइरहेकामा विभिन्न संस्थाले गम्भीर चिन्ता व्यक्त गरेका छन् ।
 

तपाईंको मत