एजेन्सी । टि–ट्वान्टी ट्राइ सिरिज क्रिकेटको चौथो खेलमा न्यूजील्याण्डले जित हात पारेको छ । न्यूजील्याण्डले इंग्ल्याण्डलाई १२ रनले पराजित गरेको हो ।

वेष्टपाक रंगशालामा १९७ रनको चुनौति पछ्याउदै ब्याटिङ गरेको इंग्ल्याण्डले निर्धारित २० ओभरमा ९ विकेटको क्षतिमा १८४ रन मात्रै बनाउन सक्यो । कुनै बेला जित नजिक पुगेको इंग्ल्याण्डले १८ र १९ ओभरमा लगातार ३ विकेट गुमाएपछि पराजित भएको हो ।

इंग्ल्याण्डका लागि डविड मलनले ५९ र एलेक्स हल्सले ४७ रन बनाएका थिए । बलिङतर्फ न्यूजील्याण्डका ट्रेन्ट बोल्ट, मिचेल साट्नर र इश सोधीले समान २–२ विकेट लिए ।

टस हारेर पहिले ब्याटिङ गरेको न्यूजील्याण्डले निर्धारित २० ओभरमा ५ विकेटको क्षतिमा उत्कृष्ट ब्याटिङ गर्दै १९६ रन बनाएको थियो । न्यूजील्याण्डका लागि कप्तान केन विलियमसनले ७२ रन बनाए । उनले ४ चौका र ४ छक्का प्रहार गरेका थिए । त्यस्तै, ओपनर मार्टिन गुप्टिलले विस्फोटक ब्याटिङ गर्दै ४० बलमा ६५ रन बनाए ।