काठमाडौं । काठमाडौं क्रिकेट ट्रेनिङ सेन्टर (केसीटीसी) र शान्तिनगर युथ क्लब मूलपानीमा जारी खुकुरी च्यालेन्जर कप क्रिकेट प्रतियोगिताको सेमिफाइनलमा प्रवेश गरेका छन् । मंगलबार भएको क्वाटरफाइनलमा केसीटीसीले वाईवाई ग्रेड हिमालयन क्रिकेट एकेडेमी (जीएचसीए) लाई र शान्तिनगरले त्रिभुवन आर्मी क्लबलाई पराजित गर्दै सेमिफाइनल यात्रा तय गरेका हुन् ।
मंगलबार माथिल्लो मूलपानी क्रिकेट मैदानमा केसीटीसीले जीएचसीएलाई २४ रनले पराजित गरेको हो । १२४ रनको चुनौति पछ्याउँदै ब्याटिङ गरेको जीएचसीएले निर्धारित ओभर सकिन ८ बल बाँकी छँदा सबै विकेटको क्षतिमा ९९ रनमात्रै बनाउन सक्यो । जीएचसीएका लागि प्रदिप ऐरीले २३ रन बनाए । त्यस्तै, कमलसिंह ऐरीले २० रन बनाए ।
केसीटीसीका लागि सुमित झाले ३ विकेट लिएका थिए ।
यसअघि टस जितेर पहिले ब्याटिङ गरेको केसीटीसीले निर्धारित २० ओभरमा ७ विकेट गुमाएर १२३ रन बनाएको थियो । केसीटीसीका लागि सुधिर चौधरीले ६४ र दुर्गेश थापाले ३५ रन बनाएका थिए ।
त्यस्तै, मंगलबार नै भएको अर्को क्वाटरफाइनलमा शान्तिनगर युथ क्लबले आर्मीलाई ७ रनले पराजित गरेको हो । १२९ रनको चुनौति पछ्याउँदै ब्याटिङ गरेको आर्मीले निर्धारित २० ओभरमा ८ विकेटको क्षतिमा १२१ रन बनाएका थिए । आर्मीका लागि लोकेन्द्र चन्दले २० रन बनाएपनि अन्य खेलाडीले राम्रो स्कोर बनाउन सकेनन् ।
शान्तिनगरका लागि योगेन्द्रसिंह कार्कीले ४ र मञ्जित श्रेष्ठले ३ विकेट लिए ।
टस हारेर पहिले ब्याटिङ गरेको शान्तिनगरले निर्धारित २० ओभरमा ८ विकेटको क्षतिमा १२८ रन बनाएको थियो । शान्तिनगरका लागि ओपनर सुनिल धमलाले ५१ रनको अर्धशतकीय पारी खेले । त्यस्तै अमित श्रेष्ठले २३ रन बनाएका थिए ।