एजेन्सी । फ्रेन्च लिग फुटबलमा शीर्ष स्थानको पेरीस सेन्ट जर्मेन (पिएसजी) ले साँघुरो जित निकालेको छ । शनिबार राति भएको खेलमा पिएसजीले टोउलुसेलाई १ – ० ले हराएको हो ।
टोउलुसेको घरेलु मैदानमा भएको खेलमा पिएसजीको लागि नेयमारले निर्णायक गोल गरे । पहिलो हाफ गोलरहीत बराबरीमा सकिएको खेलको दोस्रो हाफमा नेयमारले गोल गर्दै पिएसजीलाई जित दिलाए । नेयमारले खेलको ६८ औं मिनेटमा गोल गरेका थिए । बल पोजिसनमा पकड जमाएको पिएसजीले अन्य गोलको अवसरलाई भने सदुपयोग गर्न सकेनन् ।
यो जितसँगै पिएसजीले लिगमा १२ अंकको अग्रता बनाएको छ । पिएसजीले २५ खेलबाट ६५ अंक जोडेको छ । दोस्रो स्थानको मोनाकोको ५३ अंक छ । मोनाकोले शनिबार राति एन्जर्सलाई ४ – ० ले हराएको थियो । यस्तै लिगको तेस्रो स्थानको मार्सेलीको ५२ र चौथो स्थानको लियोनको ४८ अंक रहेको छ ।