काठमाडौं । पहिलो संस्करणको शिवम् न्यु डायमण्ड कप राष्ट्रिय खुला महिला भलिबल प्रतियोगिता हुने भएको छ । आयोजक शिवम् न्यु डायमण्ड एकेडेमीले शुक्रबार पत्रकार सम्मेलन गर्दै प्रतियोगिता माघ २१ देखि २३ सम्म हुने जानकारी गराएको हो ।
नयाँ बसपार्कस्थित ढोरपाटन भलिबल प्रशिक्षण केन्द्रको खेल मैदानमा हुने न्यु डायमण्ड कपमा राजधानीमा जारी रेडबुल ढोरपाटन युएम महिला डबल लिग भलिबल प्रतियोगिताको शिर्ष ६ स्थानमा रहने टोलीले सहभागिता जनाउने प्रतियोगिता संयोजक कुमार राईले जानकारी दिए । लिग कम नकआउटका आधारमा हुने प्रतियोगितामा सहभागी हुने ६ टोलीलाई दुई समूहमा विभाजन गरिनेछ ।
प्रतियोगिताको बिजेताले ट्रफीसहित १ लाख ५१ हजार प्राप्त गर्दा उपविजेताले १ लाख १ हजार पाउने छन् । त्यस्तै तेस्रो हुनेले ५१ हजार र चौथो हुनेले २१ हजार पाउने छन् । सर्बोकृष्ट खेलाडीले ट्रफीसहित १० हजार प्राप्त गर्दा व्यक्तिगत विधातर्फ उत्कृष्ट स्पाइकर, सेटर ,ब्लकर, क्विकर,सर्भर र डिफेन्डरले समान ५ – ५ हजार नगद तथा ट्रफी प्राप्त गर्ने छन् ।
अनुमानित ३४ लाख १४ हजार खर्च लाग्ने प्रतियोगिताको मुख्य प्रायोजक शिवम् सिमेन्ट रहेको छ । प्रतियोगिताको लागि प्रायोजक शिवमले ५ लाख नगद उपलब्ध गराउने पत्रकार सम्मेलनमा जानकारी गराइएको थियो । यस्तै दोस्रो पुरस्कारको लागि रकम न्यु डायमण्ड एकेडेमीका सुभचिन्त्तक इन्जिनियर सन्जिब महर्जनका पिता नारायण बहादुर महर्जनले प्रायोजन गरेको जानकारी समेत गराइएको थियो ।
न्यु डायमण्ड कपको आयोजक नैकापको स्कुल न्यु डायमण्ड एकेडमी नेपाली महिला भलिबलमा युवा खेलाडी उत्पादनको थलोको रुपमा रहँदै आएका छन् । २०६४ सालबाट महिला भलिबलमा लागेको यो एकेडेमी बिद्यालयस्तरको प्रतियोगितामा निरन्तर च्याम्पियन टोली हो । यस्तै ठूला प्रतियोगितामा समेत च्याम्पियन बनेको एकेडेमीले चर्चित नेपाली स्पाइकर रमिला तण्डुकार, प्रतिभा माली, रेश्मा भण्डारी, सेटर कृपा अधिकारी र डिफेन्स सलिना श्रेष्ठ जस्ता खेलाडी उत्पादन गरिसकेका छन् ।