काठमाडौं । बलिउड फिल्म इण्डस्ट्रीमा अभिनेताअर्जुन कपूर छिट्टै एक युद्धमा आधारित फिल्ममा देखिने चर्चा चुलिएको छ । उक्त फिल्ममा उनका साथ सञ्जय दत्त मुख्य भूमिकामा देखिने भएका छन् ।
फिल्ममा अभिनय गर्नका लागि दुबै अभिनेताले निर्माण पक्षसँग सम्झौतासमेत गरिसकेका छन् । आशुतोष गोवारिकरले निर्देशन गर्ने फिल्मको सन् २०१८ को अन्तिममा सुरु हुने बताइएको छ ।
बोनी कपूर सुपुत्र अर्जुन छिट्टै आफ्नो फिल्म ‘नमस्ते इंग्लैंड’ को शूटिङ गर्ने भएका छन् । यसै कारण निर्देशक आशुतोष गोवारिकरले आफ्नो आगामी फिल्मको शूटिङ यो वर्षको अन्त्य तिर सुरु गर्ने निर्णय गरेका हुन् ।
आशुतोष गोवारिकरले ‘लगान’ र ‘जोधा अकबर’ जस्ता सफल फिल्म निर्देशन गरिसकेको भारतीय सञ्चारमाध्यमले जनाएका छन् ।