काठमाडौं । नेकपा एमाले र नेकपा माओवादी केन्द्रबीच एकता प्रक्रियाका लागि बनाउने भनिएको वैचारिक र सांगठनिक समितिका लागि अझै गृहकार्य नपुगेको भन्दै विकास समिति बनाएर आइतबारको बैठक सकिएको छ ।
दुवै दलका नेता सहभागी रहेको एकता संयोजन समितिको एमाले अध्यक्ष केपी शर्मा ओली निवासमा बसेको बैठकले विकास तथा योजनाका लागि भन्दै दुवै दलका नेता सहभागी रहेको विकास तथा योजना समिति बनाएको छ ।
एमालेका नेता वामदेव गौतमको नेतृत्वमा उक्त समिति बनाइएको हो । गौतमको नेतृत्वमा रहेको समितिमा वर्षमान पुन, भिम रावल, ईश्वर पोखरेल, युवराज खतिवडा, मिनबहादुर श्रेष्ठ र विजय पौडेल रहेका छन् ।
एमाओवादी नेता नारायणकाजी श्रेष्ठका अनुसार अन्य समितिका लागि अझै केही गृहकार्य आवश्यकता देखिएको छ । आइतबार बस्ने बैठकले वैचारिक र पद बाँडफाँडका लागि समिति बनाउने तयारी गरिएको थियो ।