काठमाडौं । नेपाल प्रहरीले पूर्व डीआईजी तथा नेकपा एमालेका सांसद नवराज सिलवाललाई देशभर जहाँ भेट्यो त्यहीँ पक्राउ गर्न सातवटै प्रदेशमा सर्कुलर जारी गरेको छ ।

प्रहरी प्रधान कार्यालयले ७ वटै प्रदेशमा गरेको सर्कुलरमा ललितपुरका नवराज सिलवालाई खोजतलास गरी फेला पारेमा काठमाडौंमा बुझाउन निर्देशन दिइएको छ ।

कार्य सम्पादन मुल्यांकन किर्ते गरेको अभियोगमा सिलवालसँग सोधपुछका लागि प्रहरीले खोजी जारी राखेको छ । तर सिलवाल मलेसियामा हुने एक कार्यक्रममा भाग लिन भन्दै केहीसाता अघि त्यसतर्फ प्रस्थान गरेपछि नै नेपाल फर्किएका छैनन् । 

अदालतको फैसलापछि काठमाडौं प्रहरीले सिलवालमाथि सोधपुछ र बयान लिनुपर्ने भन्दै महानगरीय प्रहरी परिसर ललितपुरलाई गत १८ गते पत्र काटेको थियो। तर ललितपुरले सिलवाल नभेटिएको भन्दै जवाफ दिएपछि प्रहरीले सवै प्रहरी कार्यालयमा पत्रचार गरेको हो।