एजेन्सी । विश्व नम्बर एक स्पेनिस स्टार राफायल नाडाल बर्षको पहिलो ग्राण्डस्लाम टेनिस अष्ट्रेलियन ओपनको तेस्रो चरणमा प्रवेश गरेका छन् । बुधबार भएको दोस्रो चरणको खेलमा अर्जेन्टिनाका लियोनार्दो मेयरलाई पराजित गर्दै नाडाल प्रतियोगिताको तेस्रो चरणमा पुगेका हुन् ।
मेलबर्नपार्क स्थित रोड लाभेर एरिनामा भएको खेलमा नाडालले ५२ औं बरियताका मेयरलाई ६ – ३ , ६ – ४, ७ – ६ (६ – ४) ले पराजित गरे । १६ पटकको ग्राण्डस्लाम बिजेता नाडालले मेयरलाई हराउन अन्तिम सेटमा भने संघर्ष गर्नु परेको थियो । तर, अनुभवी नाडालले मेयरलाई पराजित गर्दै तेस्रो चरणमा स्थान पक्का गरे ।
जितपछि एक पटकको अष्ट्रेलियन ओपन बिजेता नाडालले यो जित आफ्नो लागि महत्वपूर्ण रहेको बताए । क्ले कोर्टको राजा मानिने नाडालले २००९ मा अष्ट्रेलियन ओपन जितेका थिए । ३१ बर्षिय नाडालले भने, “यो मेरो लागि महत्वपूर्ण जित हो । यो प्रतियोगिता मेरो मन पर्ने प्रतियोगिता हो । तेस्रो चरणमा पुग्न पाउदा खुशी छु । यो जितलाई लामो समयसम्म कायम गर्न चाहन्छु ।”
पुरुषतर्फ नै इंग्ल्यान्डका केली एडमण्डले तेस्रो चरणमा स्थान पक्का गरेका छन् । एडमण्डले दोस्रो चरणमा उज्वेकिस्तानका डेनिस स्टोमिनलाई ६ – २, ६ – २ र ६ – ४ ले पराजित गरे । तेस्रो चरणमा उनले जर्जियाका निकोलोजसँग खेल्ने छन् । यस्तै फ्रान्सका जो विलफ्रेड सोङगाले डेनमार्कका डेनिस शापोभालोभलाई पराजित गर्दै तेस्रो चरणको यात्रा तय गरेका छन् ।
महिलातर्फ दोस्रो बरियताकी कारोलिन वोज्नियाकी, सातौ बरियताकी जेलिना ओस्टापेनको र मार्टा कोस्ट्युकले तेस्रो चरणमा स्थान पक्का गरेकी छिन् । तेस्रो चरणमा प्रवेश गरेसँगै युक्रेनकी कोस्ट्युक ग्राण्डस्लाम टेनिसको तेस्रो चरणमा पुग्ने सबैभन्दा कम उमेरकी महिला खेलाडीको किर्तिमान समेत बनाएकी छिन् ।
