काठमाडौं । हरेक उडानमा मुस्कानसहितको सेवा प्रदान गर्दै आएको बुद्ध एयर विगत दुई दशकदेखि नेपाल र नेपालीलाई जोड्दै आएको छ । 
सुरक्षित, भरपर्दो र आरामदायी हवाई उडानको पर्याय बन्न सफल भएको छ बुद्ध एयर ।  बुद्ध एयर विश्वासिलो उडानको २० वर्ष सफलतापूर्वक पार गरेको छ । यसलाई यात्रुमाझ भएको विश्वासको प्रमाणको रुपमा बुद्ध एयरले लिएको छ । आन्तरिक उडानको २० वर्ष अन्य सेवा प्रदायक माझ नडगमगाइ पहिलो स्थानमा स्थापित हुनु आफैंमा गर्वको विषय भए पनि सन्तुष्ट भने नभएको बुद्ध एयरले जनाएको छ ।

कम्पनीले आगामी दिनमा अझ सशक्त र अब्बल साबित गर्न योजनाबद्ध रुपमा अघि बढ्ने तयारी थलिसकेको जनाएको छ ।  कम्पनीका कार्यकारी निर्देशक वीरेन्द्रबहादुर बस्नेतले आगामी दिनमा बुद्ध एयरको महत्वाकांक्षी लक्ष्यको रुपमा रहेको अन्तर्राष्ट्रिय उडानको खुलासा गरे ।

बुद्ध एयर अहिले उक्त योजनाको निर्माणकै क्रममा रहेको जनाएको छ ।  अन्तर्राष्ट्रिय उडानको महत्वाकांक्षी योजनालाई मूर्त रुप दिन सन् २०१८ को अन्त्यसम्ममा आफ्नो प्रारम्भिक तयारी सक्नेमा कम्पनी आशावादी रहेको छ । 

अन्तर्राष्ट्रिय उडानको उद्देश्यलाई साकार पार्न विमान उत्पादक कम्पनी, परराष्ट्र मन्त्रालय, नागरिक उड्डयन प्राधिकरण लगायतका अन्य निकायहरुसँग निरन्तर अन्तरक्रियामा व्यस्त रहेको छ ।

यी अन्तरक्रियाहरुबाट सकारात्मक परिणाम निस्केमा र पोखरा अन्तर्राष्ट्रिय विमानस्थलको निर्माण समयमै सम्पन्न भएमा कम्पनीले सन् २०२१ देखि अन्तर्राष्ट्रिय उडानको थालनी गर्नेछ । बुद्ध एयरले पोखरा अन्तर्राष्ट्रिय विमानस्थललाई अन्तर्राष्ट्रिय उडानको हब बनाइ भारत र चीनका विभिन्न शहरहरुमा उडान भर्नेछ ।  शुरुवातको क्रममा कम्पनीले तीन ठूला जहाजमार्फत अन्तर्राष्ट्रिय उडान थाल्ने योजना बनाएको छ । पछि यात्रुको चाप र मागलाई ध्यानमा राखी अन्य उडानहरु थप गर्नेछन् ।

प्रादेशिक संरचनामा देश गइसकेको अवस्थामा बुद्धले अन्तर्राष्ट्रिय उडान बाहेक आन्तरिक उडानमा समेत निरन्तर वृद्धि गर्ने योजना बनाएको छ । 

यसको सुरुवातको रुपमा जनकपुरमा ७२ सिट क्षमताका एटिआरले उडान सुरु गरिसकेको छ । राजविराज विमानस्थलको धावनमार्गको स्तरोन्नती सम्पन्न हुने बित्तिकै राजविराजमा पनि उडान सुचारु गर्ने तयारी गरेको छ ।    

बुद्धले यसअघिनै पोखराबाट भैरहवा र भरतपुरमा उडान सञ्चालन गरिसकेको छ । आगामी नयाँ वर्षदेखि पोखरबाट नेपालगञ्जको पनि उडान भर्नेछ । नेपालगञ्जको उडानबाट बर्दिया राष्ट्रिय निकुञ्ज पुग्न र सीमापारी मानसरोवर आउजाऊ गर्न पनि सजिलो हुनेछ । समग्रमा नेपालगञ्ज तथा पोखराको पर्यटन क्षेत्रलाई टेवा पुग्ने उसको विश्वास रहेको छ ।

सुर्खेतको उडान विगत केही महिनादेखि थाती रहेको छ । अब प्रदेश ६ को राजधानी बन्ने तरखरमा सुर्खेत रहेको छ । नयाँ प्रादेशिक संरचनामा यसको विकास र विस्तारमा भरपर्दो यातायातको माध्यम आवश्यक पर्नेछ जसको माग बुद्धले पुरा गर्ने अपेक्षा लिएको छ ।

गएको आवमा झण्डै १० लाख विदेशी पर्यटकहरुले नेपाल भ्रमण गरेका छन् । आगामी दिनमा यो संख्या निकै पूर्वानुमान रहेको छ । १० लाखको आधाउधीले पोखरा भ्रमण गरेकै हुन्छ । 

अवको दश वर्षमा वार्षिक २५ लाख पर्यटक पोखरा आउने बुद्ध एयरको एक अध्ययनले देखाएको छ ।