एजेन्सी । फ्रेन्च लिग फुटबल लिग वानमा मोनाको बराबरीमा रोकिएको छ । शनिबार राति भएको खेलमा मोनाको मोन्टपेलियरसँग गोलरहित बराबरीमा रोकिएको हो ।
मोन्टपेलियरको मैदानमा बल पोजिसनमा पकड जमाएपनि गोल गर्न नसक्दा मोनाकोले अंक बाँडेको हो । प्रतिस्पर्धात्मक बनेको खेलमा दुवै टोलीले एक अर्काको पोस्टमा आधा दर्जन बढी आक्रमण गरेको थियो । तर, दुवै टोलीले पाएको मौका गोल गर्न सकेनन र खेल बराबरीमा सकियो ।
यो बराबरीपछि मोनाकोले लिगमा शिर्ष स्थानको पेरिस सेन्ट जर्मेन (पिएसजी) विरुद्ध अंक दुरी घटाउने मौका गुमाएको छ । दोस्रो स्थानमा रहेको मोनाकोको २० खेलबाट ४२ अंक रहेको छ । एक खेल कम खेलेको पिएसजीको ५० अंक छ । लिगमा पिएसजी भन्दा मोनाको ८ अंकले पछि छ ।
फ्रेन्च लिग अन्तर्गत नै शनिबार राति नाइसले अमिन्स, बोर्डूअक्सले ट्रोएस र लिलीले क्यानलाई समान १ – ० ले पराजित गरेको छ । त्यस्तै डिजोन र मेट्जले १ – १ गोलको बराबरी खेल्दै अंक बाँडेका छन् ।