खेल

आर्मी खप्तड गोल्डकपको उपाधि नजिक

धनगढी । विभागीय टोली त्रिभुवन आर्मी क्लब धनगढीमा जारी नेपाल आईस सुदुरपश्चिम खप्तड गोल्डकपको फाइनलमा प्रवेश गरेको छ ।  शनिबार भएको पहिलो सेमिफाइनलमा मनाङ मर्स्याङ्दी क्लबलाई ३ – १ ले पराजित गर्दै आर्मी उपाधि नजिक पुगेको हो ।

धनगढी रंगशालामा भएको खेलमा आर्मीलाई जित दिलाउन भरत खवास, नवयुग श्रेष्ठ र सन्तोष तामाङले समान एक एक गोल गरे । मनाङका हेमन गुरुङले एक गोल फर्काए । अब आर्मीले उपाधिको लागि आइतबार हुने दोस्रो सेमिफाइनलको बिजेतासँग खेल्ने छ । दोस्रो सेमिफाइनलमा सशत्र प्रहरीको एपीएफ र आयोजक सुदूरपश्चिम ११ बीच प्रतिस्पर्धा हुनेछ ।

प्रतिस्प्रधात्मक बनेको खेलमा सुरुवाती अग्रता भने मनाङले लिएको थियो । खेलको नवौ मिनेटमा हेमन गुरुङले गोल गर्दै मनाङलाई सुरुवाती अग्रता दिलाए । तर, २३ औं मिनेटमा कप्तान भरतले गोल गर्दै आर्मीलाई खेलमा फर्काए । खेलको ४५ औं मिनेटमा म्यान अफ द म्याच भएका नवयुगले गोल गरेपछि पहिलो हाफमा आर्मीले २ – १ को अग्रता बनायो । दोस्रो हाफमा आर्मीले थप एक गोल थप्यो । खेलको ८८ औं मिनेटमा सन्तोस तामाङले गोल गर्दै आर्मीलाई ३ – १ को सहज जित दिलाए ।

योसँगै आर्मी यो बर्ष चौथो उपाधि नजिक पुगेको छ । आर्मीले यसअघि सताक्षि गोल्डकप,मेची नेत्रालय काकरभिट्टा गोल्डकप र विशाल मेमोरियलको उपाधि जितेको थियो । आर्मीले सताक्षि र मेची गोल्डकपमा भने मनाङलाई हराएर उपाधि जितेको हो । आर्मी दुहबी गोल्डकपको फाइनलमा भने मनाङसँग पराजित भएको थियो ।

प्रतियोगितामा आर्मीले थ्री स्टारलाई २ – १ ले पराजित गर्दै सेमिफाइनलमा स्थान बनाएको थियो । यता, मनाङले भने क्वाटरफाइनलमा रुपन्देही ११ लाई हराएर सेमिफाइनलमा स्थान पक्का गरेको थियो ।

प्रतियोगिताको विजेताले ११ लाख ११ हजार १ सय ११, उपविजेताले ५ लाख ५५ हजार ५ सय ५५ प्राप्त गर्नेछन् । यस्तै विभिन्न विधाका उत्कृष्ट खेलाडील समान १५–१५ हजार पाउँदा उत्कृष्ट एक खेलाडीले यमाहा मोटरसाईकल पुरस्कार पाउनेछन् ।


 

तपाईंको मत