धनगढी । तेक्वान्दोको कीर्तिमानी खेलाडी तथा ओलम्पियन दिपक बिष्ट धनगढीमा सम्मानित भएका छन् । धनगढीमा जारी नेपाल आईस सुदुरपश्चिम खप्तड गोल्डकपको अवसरमा ओलम्पियन बिष्ट सम्मानित भएका हुन् ।
तेक्वान्दो खेल र खेलकुदको माध्यमबाट नेपालको नाम उचो बनाउन सफल र सुदूरपश्चिमकै नाम राख्न सफल भएको भन्दै गोल्डकप आयोजक सुदूरपश्चिम स्पोर्ट्स क्लबले बिष्टलाई सम्मानित गरेको हो । बिष्टलाई ताम्रपत्र र आठ केजी फुलको मालाले सम्मानित गरिएको थियो । बिष्टलाई क्लबका अध्यक्ष सुरेश हमाल, एन्फाका केन्द्रीय सदस्य गणेश चन्द लगायत क्लबका पदाधिकारीले सम्मान गरेका थिए ।
कीर्तिमान तेक्वान्दो खेलाडी बिष्टले दक्षिण एसियाली खेलकुदमा ४ पटक स्वर्ण पदक जितेका थिए । चार पटक स्वर्ण जित्ने दिपक एक्लो खेलाडी हुन् । हाल तेक्वान्दोका मुख्य प्रशिक्षक रहेका बिष्टले एसियन खेलकुदमा २ कास्य जितेका थिए ।
राष्ट्रिय तथा अन्तर्रा्ष्ट्रिय खेलाडी संघका यसअघिका अध्यक्ष समेत रहेका बिष्टले एक पटक ओलम्पिक खेलकुदमा नेपालको प्रतिनिधि गरेका थिए । बिष्टले सन् २००८ को बेईजिङ ओलम्पिक खेलेका थिए ।