Skip Advt.

छोरालाई विद्यालय जाने बाटो बनाइदिन २ वर्षसम्म चट्टान फुटाएका यी बहादुर बुबा 

छोरालाई विद्यालय जाने बाटो बनाइदिन २ वर्षसम्म चट्टान फुटाएका यी बहादुर बुबा 

काठमाडौं । भारतका एक समर्पित र बहादूर पिताले आफ्ना तीन छोरालाई पढाउन २ वर्षसम्म दैनिक पहाडका ढुङ्गा फुटाएर ८ किलोमिटरको बाटो निर्माण गरेका छन् । हिमाली भेगको अत्यन्तै विकट स्थानमा बस्ने हुनाले सबै स्थानीयवासीहरु दैनिक सुविधाको अभावमा गाउँ छाडेर गएपनि उनले भने हिम्मत हारेनन् ।

आफ्ना छोराहरु नजिकैको शहरमा पढ्ने भएकाले उनीहरुका लागि सुरक्षित बाटो निर्माण गर्न उनले दुई वर्षदेखि लगातार ८ घण्टा काम गर्ने गरेको भारतीय सञ्चार माध्यमले बताएका छन् । जलन्दर नायक नाम गरेका यी व्यक्ति ओढिसा गुमसाहीका एकमात्र वासिन्दा हुन् । उनले केबल हम्मर र बेल्चाको प्रयोग गरेर ८ किलोमिटरसम्मका चट्टानहरु फुटाई शहरसम्म पुग्ने बाटो  निर्माण गरिसकेको बताइएको छ । आफ्ना तीन छोराले सजिलैसँग विद्यालय जान पाऊन् भन्ने मनसायले उनले यस्तो काम थालेको उनको भनाइ छ ।

उनको लक्ष्य अझै तीन वर्षसम्म यसैमा लागि परेर १५ किलोमिटरसम्मको बाटो बनाइ गाउँलाई नजिकैको फुलबानी शहरसम्म जोड्नु रहेको उनले बताए । उनका छोराहरु त्यहीँको स्कुलमा पढ्ने भएकाले बाटोको अभावमा उनीहरु दैनिक जोखिमयुक्त र अफ्ठ्यारो यात्रा गर्न बाध्य भएको नायकले कलिङ्गा टिभीलाई बताएका हुन् । 

उनले भने, ‘मेरा बच्चाहरुलाई साघुँरो र ढुङ्गैढुङ्गाको बाटो प्रयोग गर्न धेरै कठिन हुने गरेको छ । कतिपटक त उनीहरु ढुङ्गामा चिप्लिएर लड्दा गम्भीर चोटपटक समेत लाग्ने गरेको छ । त्यसैकारण उनीहरु सजिलोसँग र सुरक्षितसाथ विद्यालय जान सकून् भनेर मैले ढुङ्गा फोडेर हिँड्न लायकको बाटो बनाउने अठोट गरेको हुँ । ’ 

नायकको यस्तो मार्मिक र बाहदुरीपूर्ण कहानीका बारेमा यसअघि कसैलाई थाहा थिएन तर जनवरी ९ मा हिन्दुस्तान टाइम्सले यसको रिपोर्ट प्रकाशन गरेर ४५ वर्षीय नायकको कथा सबैमाझ सार्वजनिक गराएको हो ।

स्थानीय पत्रिकामा प्रकाशित भइसकेपछि यसले सरकारको ध्यान पनि केन्द्रित गर्न सफल भयो । र यसै अन्र्तगत सरकारले ग्रामीण क्षेत्रको विकासमा लागिपरेको भन्दै उनको मेहनत र बहादुरीलाई पुरस्कृत गर्ने निर्णय सुनाइसकेको छ । उनको कथाबारे थाहा पाएपछि मार्मिक बनेका सरकारी कोषका प्रबन्धकले नायकको अहिलेसम्मको सम्पूर्ण मेहनतको बदलामा उनलाई सरकारी कोषबाट नगद प्रदान गरिने निर्णय लिएका छन् । शहरसम्म बाटो पुर्याउन थप मद्दत गर्न आर्थिक सहयोगका साथै सरकारले अन्य कामदार र कर्मचारीहरु पनि थपिदिने निर्णय गरेको नायकले खुसी हुँदै बताएका हुन् ।

अहिले भारतीय सञ्चार माध्यमले नायकलाई माझी नाम गरेका अर्का यस्तै व्यक्तित्वसँग तुलना गरिरहेका छन् जसले २२ वर्षसम्म त्यसरी नै चट्टानहरु फुटाएर नजिकको शहरसम्म बाटो पुर्याउने प्रयास गरेका थिए । शहर जाने क्रममा जोखिमयुक्त बाटोका कारण पहाडबाट खसेर माझीकी पत्नीको मृत्यु भएपछि उनले आफ्नो आधा जीवन पहाडका ढुङ्गा फोडेरै बिताएका थिए । माझीको जीवनमा आधारित फिल्म समेत बनाइएको थियो ।

प्रतिकृया दिनुहोस