धनगढी । प्रधानमन्त्री शेरबहादुर देउवाले प्रदेश प्रमुख र अस्थायी राजधानी तोक्नका लागि पटक पटक गरिएको छलफलमा सहमति जुटन नसकेको बताएका छन् ।
शनिबार हुने सुदूरपश्चिम विश्वविद्यालयको दिक्षान्त समारोहमा सहभागि हुन आएका देउवाले शुक्रबार धनगढी विमानस्थलमा पत्रकारसँग कुरा गर्दै सहमति नभएकोले अब सरकारले आफैँ तोकिदिने बताएका हुन् ।
उनले अहिलेसम्म पटक–पटक अन्य दलहरुसँग छलफल गरिएको तर सहमति हुन नसकेकाले संविधानअनुसार अब सरकारले अस्थायी राजधानी र प्रदेश प्रमुख तोक्ने बताए ।
देउवाले आफु सरकारको नेतृत्व छोडन तयार रहेपनि राष्ट्रिय सभाको निर्वाचनअघि छोडने अवस्था नभएकाले राष्ट्रियसभाको चुनाव गरेर छोडने बताए । ३३ प्रतिशत महिलाको सहभागिताका कारणले राष्ट्रियसभाको निर्वाचनपछि मात्रै प्रतिनिधिसभाको गठन हुने संवैधानिक व्यवस्था भएकाले सरकार छोड्न ढिलाई भएको उनको भनाई थियो ।
संविधान कांग्रेसको नेतृत्वमा लेखिएको र कांग्रेसले तीन वटै तहको निर्वाचन सम्पन्न गरेर संविधान कार्यान्वयन गरेको पनि देउवाको दाबी थियो ।